PM Xanana Vizita Fundasaun Mário Soares, Reforsa Valor Demokrásia no Memoria Istórika

Hatutan.com, (24 Juñu 2026), Lisboa– Primeiru-Ministru Kay Rala Xanana Gusmão, hala’o vizita kortezia bá Fundasaun Mário Soares, iha Lisboa, hanesan parte hosi programa ofisiál vizita servisu iha Portugal.

Lee Mós: Supremu Tribunál Justisa Portugal Prontu Apoia Reforma Justisa Timor-Leste

Primeiru-Ministru Kay Rala Xanana Gusmão, hala’o vizita kortezia bá Fundasaun Mário Soares, iha Lisboa-Portugal.

Durante vizita ne’e, PM Xanana fó valór aas bá kontribuisaun Mário Soares nian bá prosesu demokratizasaun iha Portugal, liu-liu papél importante iha Revolusaun 25 Abril, ne’ebé ajuda hasai Portugal hosi sistema ditadura militár no kontribui bá reestabelesimentu demokrasia iha país ne’e.

Iha komunikadu imprensa  ne’ebé Hatutan.com asesa hateten Primeiru-Ministru subliña, Mário Soares nu’udár figura istórika importante ida iha luta bá liberdade, demokrasia no direitus umanus, no nia kontribuisaun sai referénsia globál bá nasaun sira ne’ebé sei dezenvolve sistema demokrátiku.

Vizita bá Fundasaun Mário Soares hanesan oportunidade importante atu aprende hosi istória polítika Portugal nian, liu-liu kona-bá prosesu tranzisaun demokrátiku no konsolidasaun instituisaun Estadu.

Durante vizita ne’e, Fundasaun ne’e mós entrega livru lubuk ida bá delegasaun Timor-Leste, ne’ebé sei tau iha Xanana Reading Room, hodi permite sidadaun Timor-Leste sira bele asesu bá literatura no dokumentu sira relasiona ho demokrasia, istória no governasaun.

“Inisiativa ne’e sei kontribui bá formasaun intelektuál no konsiénsia sosiál jerasaun foun Timor-Leste nian, liu-liu iha komprensaun kona-bá valor demokrátiku sira,” PM Xanana hateten.

Mário Soares ho nia kaben mós hanesan figura polítika sira ne’ebé sempre defende liberdade, demokrasia no dignidade umana, no sai inspirasaun bá lideransa sira iha mundu tomak.

PM Xanana sente kontente tebes bele vizita Fundasaun Mário Soares ne’ebé prezerva memória istórika no kontribui bá edukasaun sívika no demokrátika.

Vizita ne’e Primeiru-Ministru Xanana Gusmão akompaña hosi Embaixadór Timor-Leste bá Portugal, Manuel de Araújo Serrano no Xefe Gabinete Primeiru-Ministru, Elizabeth Exposto.

Jornalista: Marcelino Tomae