Hatutan.com, (26 Juñu 2026) Metinaro– Domingos Guterres alin husi saudozu Francisco Guterres Lú-Olo reprezenta famiília hato’o agradese ba povu no ai-leba sira ho mós jornalista sira, IX Governu Konstitusionál no Autoridade Seguransa hotu ne’ebé hola parte iha prosesu hotu falesimentu Saudozu Lú-Olo to’o haloot iha Jardin Eoris Metinaro.
Lee Mós: Saudozu Francisco Guterres Lú-Olo Moris iha Povu Ki’ik no Ki’ak Nia Fuan
“Orgullu ba ami hanesan família maktoban ninian, no la haluha mós ami agradese povu doben Timor-Leste tomak husi nivél nasionál to’o iha baze, ba sira nia partisipasaun no sira lakon duni sira nia ema di’ak ida,” Domingos Guterres hateten lia agradesimentu iha àmbitu halot saudozu Francisco Guterres Lú-Olo iha Jardin Herois da Pátria, Metinaro Sesta (26/06/2026).
Iha biban ida-nee mós nia agradese ba IX Governu konstitusionál ne’ebé liuhusi servisu Ministru Asuntu Kombatentes Libertasaun Nasionál (MAKLN) Gil da Costa Monteiro “Oan Soru” ne’ebé durante ne’e akompaña família to’o haloot saudozu ho di’ak no dignu.
“Nu’udar maktoban ninia família, ami orgullu liu husi señór Ministru no Sekretáriu Estadu no ami nia partidu FRETILIN ho nia membru tomak ne’ebé akompaña no fó korajen tomak ida ne’e ami orgullu. Aleinde ne’e mós ba FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL, no mós média/jornalista sira hotu ne’ebé halo kobertura iha biban ida-ne’e, ami hakruk no agradese tomak ba sira hotu,” refrezenta família afirma.
Agradese mós ba polítiku no kamadas hotu-hotu sira ne’ebé mak iha Timor-Leste, tanba saudozu nia isin-mate partidu polítiku hotu-hotu nia prezensa, ida ne’e mak Lú-Olo duni.
“Lú-Olo ema ida pasensia, simples maibé fó ezemplu ba ema hotu, ha’u orgullu duni ba ha’u nia maun tanba fó ezemplu di’ak bá ha’u. Nune’e mós ha’u husu ba membru sira hotu-hotu ne’ebé mak iha partidu FRETILIN sai modelu ida ne’e, Francisco Guterres Lú-Olo mak mate espiritu Lú-Olo tenke moris iha FRETILIN nia laran, no ba povu hotu-hotu iha Timor-Leste,” alin husi saudozu Lú-Olo informa.
Reprezentante família hateten durante maktoban moris iha vida polítika no rezisténsia nia laran, sé karik halo buat ruma la loos husi nia desizaun, no orientasaun sira karik reprezenta família hakruk no husu deskulpa.
Iha fatin hanesan Sekretáriu jerál partidu FRETILIN agradese ba apoiu tomak hetan husi estudu, Governu no ba ema hotu-hotu to’o serimónia funeral Saudozu Francisco Guterres Lú-Olo.
“Ha’u hakarak hateten de’it bá kamarada Cidalia hanesan Prezidente Lú-Olo nia espoza, ha’u la gosta dehan faluk ha’u la gosta dehan oan kiak, tanba Lú-Olo fizikamente dook emosionalmente família Lú-Olo sei kontaktu nafatin. Ha’u hakarak hateten de’it katak ita lori Lú-Olo mai haloot ona iha Jardín dos Herois,” Mari Alkatiri liuhusi nia diskursu iha serimónia halot saudozu Francisco Guterres Lú-Olo iha Jardín dos Herois Metinaro.
Mari Alkatiri hatutan, uluk kuandu sira iha asembleia konstituinte ko’alia ba malu diskuti buat ruma oinsá mak trata veteranu sira ho eróis no eroiña sira, ideia Jardín dos Herois moris tanba ema barak tebes no Jardín Herois iha munisípiu sira.
“Tanba ne’e ha’u dehan ba mana Cidalia ho subriñu sira hotu ita mai haloot ha’u nia kamarada, ita boot nia pai, kaben, balun nia avo no tiun iha fatin ida que ideia sai husi ami hotu ita bele fó kondisoens memoria sira nia atu buras, atu bele haburas mós ita nia historia”, dehan Mari Alkatiri.
Sekretáriu Jerál Partidu FRETILIN Mari Alkatiri, agradese ba apoiu tomak hetan husi estudu no Governu husi estrutura estadu nian hanesan PNTL, F-FDTL ba komisaun iha serimónia ne’e tomak.
“Ha’u akompaña família Lú-Olo ninian iha loron ikus sei moris iha Kuala Lumpur Malázia ha’u hatene nia luta boot para moris nafatin, tanba ne’e nia forsa nafatin ba nia no ba ita hotu, família emlutada bele hetan garantia katak uma lisan FRETILIN sei nafatin ita nia hotu”, Mari Alkatiri esplika.
Joranlista: Juvinal Cabral dos Santos
