Família Saudozu Lú-Olo Rekomenda Hadi’a Sistema Setór Saúde

Hatutan.com (26 Juñu 2026) Díli– Domingos Guterres nu’uda alin no reprezenta família saudozu Francisco Guterres “Lú-Olo”  rekomendas ba Estadu no ba Governu atu hadi’a sistema iha setór saúde Timor-Lest. Nune’e, bele fó atendimentu ida di’ak no dignu ba nia povu sira.

Lee Mós: Família Saudozu Lú-Olo Agradese Ba Povu, Ba Jornalista sira no Entidades Hotu Nia Kontribuisaun

Prezidente Repúblika, José Ramos-horta entrega bandeira RDTL ba Saudozu nia oan mane iha ámbitu halot Saudozu iha Jardín Erios da Pátria Metinaro, Sesta (26/06/2026). Foto/Juvinal Cabral dos Santos

“Timor-Leste  iha osan barak,  saida mak falta tan, rekursu mak la iha ka aparelu mak la iha ka jestaun mak menus, presiza tenke halo diagnostiku ida kle’an,” Domingos Guterres hateten iha mensajen  iha serimonia funeral Saudozu Francisco Guterres “Lú-Olo” iha Jardín Erois da Pátria Metinaro, Sesta (26/06/2026).

“Ba parte governu, ami família Saudozu Lú-Olo nian  rekomenda hadia sistema no mekanizmu ne’ebé mak agora dadauk iha, ha’u hanoin atu hadia buat hirak sira ne’e la’ós governu nia sala de’it. Maibé ita hotu-hotu nia kontribui para bele hadia ita nia sistema saúde ne’ebé mak agora dadauk iha. Investe bá aparelu ne’ebé mak iha para bele asegura ita nia veteranu sira no  sira tuir mai, ita hakarak hadia atu labele sofre tan situasaun sira hanesan ne’e,” alin husi Saudozu Lú-Olo haktuir.

“Iha biban ida-ne’e ne’e mós ha’u hakarak hato’o rekomendasaun ba parte estadu no Governu no mós ba partidu, bá estadu ha’u hanoin tempu to’o ona para hadia ita-nia estadu ne’ebé ba di’ak ne’ebé dignu no proteje ita nia sosiedade hotu-hotu tantu iha nivél nasionál to’o munisípiu” Domingos Guterres informa.

Família mós rekomenda ba Sekretáriu Jerál Partidu FRETILIN ho nia membru komité sentrál FRETILIN  (CCF) husi nivél nasionál to’o suku, tempu ona tenke pasiensia, tenke hatudu duni katak Lú-Olo sai ezemplu.

“Ema ida pasiensia, lakohi ko’alia barak nia hakarak buka mak amizade ne’ebé barak di’ak liu amigu duké inimigu, ha’u hanoin ba kamarada sira kadaves liafuan ne’e ladún di’ak maibé to’o ona tempu ita tenke onestu ona, para hadia sasán sira ne’e ho di’ak,”  dehan Domingos Guterres.

Família agradese ba povu Timor-Leste tomak, ne’ebé mai prezensa iha serimónia maktoban Eroi Nasionál Francisco Guterres “Lú-Olo” nia fatin ikus  nian ihja Jardín Herois da Pátria Metinaro.

“Ha’u hanoin povu hotu-hotu triste, la’ós família de’it mak triste ha’u hanoin Timor-Leste triste hotu, tanba Lú-Olo ema simples maibé hakarak duni hakuak ema hotu, nia la haree ba kor, la haree ba rasa, la haree ba metan ga mutin maibé nia haree hanesan ema Timor oan,” alin husi saudozu Lú-Olo haktuir.

“Maun maktoban kamarada Lú-Olo adeus adeus lakon duni ona husi ami”, Alin husi Saudozu Francisco Guterres Lú-Olo hato’o liafuan ikus ho mata-been.

Eis-Prezidente Repúblika Demokrátika Timor-Leste no atuál Prezidente Partidu FRETILIN, Francisco Guterres Lú-Olo, hakotu iis  iha Ospitál Prince Court, Kuala Lumpur, Malázia, hafoin hala’o tratamentu saúde intensive, Domingu-kalan 21  Juñu 2026.

Saudozu Lú-Olo moris iha loron 7 Setembru 1954 Ossu, Munisípiu Viqueque.  Nia husik hela ona nia kaben ho Cidália Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dália Luliana Nobre Guterres.

 Jornalista: Juvinal Cabral dos Santos