Kazu Scam Call Centre Metiaut, Ministériu Públiku Solisita bá Tribunál Aplika Médida Kautelár Kausaun US$2500 bá Kada Arguidu

Hatutan.com,  (11 Jullu 2026), Díli– Tribunál Judisiál Primeira Instánsia Díli (TJPID), Sábadu (11/07/2026), hala’o primeira interrogatóriu ba arguidu na’in-28 ne’ebé alegadu envolve iha atividade ilísitu scam call centre.

Lee Mós: PNTL Desmantela Scam Call Centre Iha Metiaut, Detein Na’in-24 no Na’in-19 Halai

PNTL aprezenta arguidu sira kazu scam call centre iha Metiaut ba TJPID, Sábadu (11/07/2026). Foto/Marcelino Tomae

Arguidu sira ne’e, autoridade Polísia aprezenta ba Ministériu Públiku hafoin halo kapturasaun no detensaun tanba deskonfia envolve pratika scam call centre iha rezidénsia ida iha Metiaut, Díli, Kinta 09 Jullu 2026.  

Iha audénsia juglamentu primeira interrogatóriu ne’e, Ministériu Públiku (MP) representa husi Prokuradór Rafael Gusmão, solisita ba  juiz turnu José Maria, atu aplika médida kautelár kausaun (cautelar de caução) ho montante US$70,000 ba arguido na’in-28 ho nune’e kada arguido aplika koasaun US$2500.

Medida kautelár ba seguransa (cautelar de caução) maka garantia patrimoniál ka pesoál ne’ebé ezije atu garante kumprimentu obrigasaun ida ka atu kompensa prejuizu posivel sira ba parte seluk iha prosesu legál. Juíz determina ka aseita ida-ne’e (reál ka pesoál) atu prevene argiduidu sira dezevia ka halai enkuantu aksaun prinsipál la’o hela.

Iha audénsia julgamentu ne’e, Juiz José Maria, halo  indentifikasaun ba arguidu sira no fó oportunidade ba kada arguidu atu bele hato’o deklarasaun, maibé  arguidu na’in-28 ne’e hili  nonok. Tanba ne’e Tribunál fó tempu bá Minitériu Públiku  hodi hato’o alegasaun.

Ministériu Públiku  konsidera  médida kautelár kausaun (cautelar de caução) ne’e importante atu garante arguidu sira kontinua kolabora ho prosesu investigasaun no marka prezensa bainhira   autoridade kompetente sira  bolu.

Ministériu Públiku konstitui arguidu na’in-28 ho krime jogu ilísitu, Asosiasaun Kriminoza, no Burla Informátika, tuir dispozisaun sira ne’ebé previstu  ona iha kódigu Penál Timor-Leste.

Advogadu privadu sira ne’ebé reprezenta arguidu na’in-28, hanesan Otavio Cardoso, Januario Martins, Adelina Mello no José Ximenes, aseta ho alegasaun Ministériu Públiku kona-bá aplikasaun médida kautelár  kausaun no proibisaun auzénsia bá sira-nia kliente  na’in-28.

Iha  Kinta,  09 Jullu 2026, Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) desmantela atividade ilísitu scam call centre iha Metiaut, Díli.

Husi operasaun buska no apreensaun ne’e, PNTL halo kapturasaun ba sidadaun estranjeiru ho nasionalidade Xina na’in-20 no deskonfia na’in-19 halai sai tiha bainhira haree ekipa konjunta PNTL to’o iha lokál operasaun.

Jornalista: Marcelino Tomae