WNI Ne’ebé Komete Kazu Droga Kumpre Medida Koasaun Prizaun Preventiva

Hatutan.com, (14 Setembru 2026), Díli–Tribunál Judisiál Primeira Instánsia Díli (TJPID), Segunda (14/09/2026), hasai  despaisu ikus hodi aplika medida koasaun prizaun preventiva ba sidadaun Indonézia (WNI/warga negara Indonesia) ho insiál WJ  ne’ebé sai arguidu ba kazu trafiku droga.  

Lee Mós: Breaking News: Autoridade Timor-Leste kaptura WNI ida lori droga

Autoridade Timor-Leste aprezenta arguidu kazu droga ba julgamentu primeiru interogatoiu iha TJPID, Segunda (14/09/2026). Foto/Hatutan.com

Arguidu WJ tama teritóriu Timor-Leste  iha loron 28 Agostu 2026 via terrestre, nune’e, autoridade Timor-Leste halo identifikasaun hodi submeter pedidu formal ba Ministériu Públiku no hatutan ba Tribunál hodi hasia mandadu kapturasaun ho prosesu NUC: 0407/26-PCCIC.

Juíz  prosesu Argentino Luísa Nunes  iha primeiru julgamentu interogatoriu iha Tribunál Judisiál Primeira Instánsia Díli, hasai despaisu hodi aplika medida koasaun prizaun preventiva ba arguidu ho inisiál WJ tanba konsidera faktu ne’ebé aprezenta husi Ministériu Públiku provadu.

Prokuradór Matias Soares ne’ebé reprezenta Ministériu Públiku, akuzou arguidu WJ ho krime tráfiku ilísitu droga ne’ebé previstu iha Lei Númeru 2/2017, loron 25 Dezembru, kona-ba kombate tráfiku no konsumu ilísitu droga.

Defensór Públiku Juvinal Yanes Freitas, ne’ebé fasilita asistensia legal ba arguido WJ husu ba Tribunál  atu labele aplika medida koasaun prizaun preventiva  tanba arguidu la nega  faktu sira hotu-hotu ne’ebé Ministériu Públiku akuza.

Defeza Juvinal Yanes Freitas solisita bá Tribunál atu aplika medida koasaun aprezentasaun periódika semana  ida dala ida.

Autoridade Timor-Leste kompostu husi Polísia Sientifiku Investigasaun Kriminál (PCI) ho Servisu Nasionál Intelijénsia (SNI) kaptura arguidu WJ  iha Díli ho prova hanesan droga  hamutuk grama 98,0162, kompostu husi tipu sabu-sabu (Metamfetamina) grama-93,9367, no no exstasi (MDMA)    grama-4,0795. (*)