Timor Gap sosa ona asaun Osaka Gas porsentu 10, seidauk bele publika montante osan akizasaun

Reportajen: Maria Angelita Sandi Belo

Hatutan.com, (25 Setembru 2026), Díli—Timor Gap, Empreza Públiku (E.P) sosa ona asaun porsentu 10 husi empreza Osaka Gas Austrália iha kampu Greater Sunrise. Maske nune’e, Osaka Gas ho Timor Gap konkorda malu atu labele publika lai montante orsamentu ba akizasaun ne’e.

Foto/Repro.Timor Gap,E.P

Prezidente no Diretór Ezekutivu Timor Gap, Rui Maria Alves Soares, konfirma katak  tranzaksaun komersiál ne’e parte rua kompromete atu labele públika nia valór ba publiku.

“Akordu asina ona, lori ona ba iha Governu Austrália ho Timor-Leste, ita hein sira aprova loos ona,” Rui Maria Alves Soares inform aba jornalista sira iha Díli, Sesta (25/09/2026).

Nia esplika katak fundamentasaun Timor Gap halo akizasaun ba asaun porsentu 10 Osaka Gas nian tanba Osaka Gas hakarak foka ba atividade seluk, katak Osaka Gas investe fatin seluk fali, nune’e Osaka Gas  deside husik hela no sira ne’e entrega fali ba Tmor Gap.

Tuir Rui Maria Alves Soares, Timor Gap  sosa asaun Osaka Gas  ne’e di’ak liután hodi asegura aumentu partisipasaun Timor-Leste nian hodi dada kadoras Greater Sunrise mai Timor-Leste.

Ho akizasaun porsentu 10  asaun Osaka Gas nian ne’e halo Timor Gap aumenta nia partisipasaun iha kampu Greater Sunrise sa’e husi porsentu 56.56 ba porsentu 66.56.  

Anteriormente partisipasaun empreza sira iha  kampu espesiál Greater Sunrise, kompstu husi Timor Gap ho porsentu 56.56, Woodside Energy ho porsentu 33.44, no Osaka Gas ho porsentu 10%.

“Aspetu komersiál, téknika, desizaun estratéjika, ita kontrola másimu bele orienta tuir objetivu. Nune’e kona-bá akizasaun ne’e aprovasaun finál husi governu Austrália ho Timor-Leste tanba Greater Sunrise ne’e iha área espesiál,” Rui Maria Alves Soares esplika.

Sita husi pajina ofisiál TIMOR GAP, E.P ne’ebé públika iha loron 2 Setembru 2026, haktuir Timor Gap alkansa ona akordu vinkulativu ho Osaka Gas Austrália Pty Ltd hodi sosa ninia partisipasaun porsentu 10 iha projetu Greater Sunrise, ne’ebé sei sujeitu ba aprovasaun governu no regulamentu sira ne’ebé presiza no tuir kondisaun baibain.

Akizisaun ne’e konstitui etapa importante ida hodi reforsa partisipasaun Timor-Leste nian iha projetu Greater Sunrise no apoia avansu ba konseitu dezenvolvimentu Timor LNG no ba Desizaun Finál Investimentu (FID) iha futuru.

Ho rekursu kontinjente ne’ebé estima hamutuk billaun 5,13 pé-kúbiku gás no millaun 225,9 barríl kondensadu, Greater Sunrise kontinua sai rekursu estratéjiku ida ba Timor-Leste no ba nia povu. (*)