Caritas Austrália troka hanoin ho PM Xanana kona-bá sira-nia apoia mai Timor-Leste

Reportajen: Maria Angelita Sandi Belo

 Hatutan.com, (29 setembru 2026), Díli– Primeiru-Ministru Kay Rala Xanana Gusmão, enkontru ho Caritas Austrália  hodi troka hanoin kona-bá  Caritas Austrália sira-nia apoiu mai Timor-Leste iha área  advokasia ba kestaun prevensaun  violénsia bazeia ba jéneru, reziliénsia, resposta umanitária no mudansa klimátika.

Primeiru-Ministru Kay Rala Xanana Gusmão, kaer-liman Delegadu Caritas Austrália, Bispu Michael Kennedy. Foto/Maria Angelita Sandi Belo

“Iha dader ne’e, ami foin hasoru Primeiru-Ministru, nia simu ami ho laran-luak no fó tempu barak ba ami. Ami iha oportunidade atu ko’alia ho nia kona-ba projetu balun ne’ebé Caritas hala’o iha Timor-Leste, ami kontente tebes tanba Primeiru-Ministru fahe ho ami kona-ba dezafiu sira ne’ebé povu Timor-Leste hasoru, maibé mos kona-ba orgullu no kontente bo’ot ne’ebé iha entre povu sira iha Timor-Leste, nia mós fahe ho ami kona-ba istória ida ne’ebé ita-nia nasaun bele orgulhu tebes, no kona-ba luta no difikuldade sira ne’ebé ita hotu liu hamutuk,” Delegadu Caritas Austrália, Bispu Michael  Kennedy haktuir hafoin sorumutuk ho PM Xanana iha Palásiu Governu, Tersa (29/09/2026).

Diretora Ezekutiva Caritas  Austrália, Kirsten Sayers, hatete, Caritas Austrália la’o hamutuk ho povu Timor-Leste husi tinan 1990 nia rohan, no nia prezensa permanente iha Timor-Leste husi tinan 1999.

“Importante tebes atu akompaña no hasoru komunidade sira iha sira-nia situasaun rasik, no apoia sira iha área hanesan violénsia bazeia ba jéneru, reziliénsia, resposta umanitária no mudansa klimátika,” Kirsten Sayers haktuir.

Caritas liu ona hosi dezafiu barak iha pasadu, no agora haree ba oin atu responde ba nesesidade sira no área sira ne’ebé importante ba futuru.

“Ami hakarak servisu hamutuk ho Igreja, juventude, feto sira no membru hotu-hotu iha sosiedade, atu apoia no akompaña Timor-Leste iha ita-nia viajen notável nu’udar nasaun ida,” Kirsten Sayers tenik.

Caritas servisu hamutuk ho Padre sira no membru sira iha Caritas Timor-Leste atu nune’e sira bele hamriik hamutuk no fó apoiu ba Timor-Leste iha nia viajen ba futuru.

Xefe Eskritoriu Caritas Iha Timor-Leste, Fernando Pires hatete, Caritas Austrália nia prezensa iha Timor-Leste husi tinan 1999 no kontinua fó resposta no servisu ba parseiru sira iha área oi-oin.

Caritas apoia justisa no servisu ba futuru, servisu hamutuk ho parseiru lokál sira iha munisípiu, inklui iha área mudansa klimátika, prevensaun violénsia no oportunidade ba juventude.

“Ami hakarak fó oportunidade ba joven sira atu moris, aprende, estuda no prepara an ba futuru, tuir hanorin no apelu hosi Papa Francisco, Caritas Australia kompromete-an atu kontinua servisu hamutuk ho nia parseiru sira iha Timor-Leste no ho Caritas Timor-Leste, atu harii futuru ida ne’ebéjustu ba ema hotu,” Fernando Pires konklui. (*)