Proposta Orsamentu PN 2027 ho Montante US$19.240.495 Aprova ho Votu A-favor 49

Reportajen: Maria Angelita Sandi Belo

Hatutan.com, (29 setembru 2026), Díli-Parlamentu Nasionál (PN)  liu husi  sesaun plenária ordináriu, Tersa (29/09/2026), aprova projetu rezulusaun PN númeru 83/VI/(4ª) kona-bá Orsamentu PN ba tinan 2027 nian.

Parlamentu Nasionál (PN) liu husi sesaun plenária ordináriu aprova orçamento anuál PN nian ba tinan 2027, Tersa (29/09/2026). Foto/Média PN

Proposta orsamentu anuál PN ba tinan fiskál 2026 ho total US$19.240.495  hetan aprovasaun  ho votus a-favor 49, kontra 0 no abstensaun  tolu (3).

Hanesan publika iha pajina ofisiál Media Parlamento Nacional, deskreve katak proposta Orsamentu Anual Parlamentu Nasionál ba tinan 2027 ho total US$19.240.495 fahe ba Kategoria Despeza lima mak hanesan;

• Salários e Vencimentos: US$ 1.292.697;
• Bens e Serviços: US$6.470.116 (34%);
• Capital Menor: US$497.876;
• Capital Desenvolvimento: US$0;
• Transferências Públicas: US$979.806.

Proposta Orsamentu Parlamentu Nasionál ne’ebé aprova liu husi Projetu Rezolusaun ida ne’e sei haruka ba Governu hodi kontempla iha Orsamentu Jerál Estadu ba tinan 2027 nian, atu garante rekursu finanseiru ne’ebé nesesáriu ba funsionamentu Parlamentu Nasionál.

Molok aprova proposta lei refere, Presidente Komisaun C, ne’ebé trata Asuntu Finansas Públikas, Deputada Cedelizia Faria dos Santos, ho relatora komisaun nian, Deputada Aliança da Conceição Araújo, aprezenta relatóriu no pareser kona-bá proposta orsamentu refere.

Iha Períodu Antes Ordem do Dia, Komisaun E ne’ebé trata asuntu Infraestrutura, reprezenta husi nia Vise-Prezidente, Deputadu Oscar de Araújo, akompaña husi relatora, Deputada Irene Gonzaga Sarmento, aprezenta Relatóriu Fiskalizasaun ba RAEOA-ZEESM.

Hafoin ne’e, Bankada FRETILIN hato’o Deklarasaun Polítika. Tuir mai, Deputadu sira hato’o preokupasaun kona-bá problema sira iha territóriu nasionál, nomeadamente iha área saúde, edukasaun no infraestrutura bázika, inklui mós kestaun ekonomia no jestaun merkadu, hanesan inséndiu iha Merkadu Taibesi no Komoro, no desorganizasaun iha Merkadu Taibessi, aleinde preokupasaun sosiál sira seluk. aleinde preokupasaun sosiál sira seluk ne’ebé presiza atensaun husi Governu no instituisaun relevante sira.

Relasiona ho inséndiu iha merkadu rua refere, Deputadu sira husu ba Governu atu tau-matan no fóapoiu rekuperasaun urjente ba vítima sira, hodi nune’e sira bele kontinua sira-nia moris no atividade ekonómika.

Sesaun Plenária ne’e, prezidi husi Prezidente Parlamentu Nasionál, Maria Fernanda Lay, akompaña husi membru Meza sira, no hetan prezensa husi Vise-Ministru Asuntu Parlamentár, Adérito Hugo da Costa. (*)