Konsellu Superiór Defeza no Seguransa Analiza Situasaun Seguransa iha Rai-Laran

Jornalista: Felix Fernandes

Hatutan.com, (01 outubru 2026), Díli  – Prezidente Repúblika, José Ramos-Horta, Kinta (01/10/2026), konvoka reuniaun Konsellu Superiór Defeza no Seguransa (KSDS) hodi analiza situasaun seguransa iha rai-laran, liuliu kona-bá krime sibernétiku, tráfiku droga, no tráfiku umanu.

Prezidente Repúblika, José Ramos-Horta konvoka sorumutuk Konsellu Superiór Defeza no Seguransa iha Palásiu Prezidensiál, Kinta (01/10/2026). Foto/Média GPR

Primeiru Ministru, Xanana Gusmão  nu’udar membru KSDS ne’ebé partisipa mós iha sorumutuk  iha Palásiu Prezidensiál ne’e informa, Konsellu Superiór Defeza no Seguransa hahú halo análiza kriitiku sira ba situasaun seguransa iha rai-laran no mós situasaun rejional no internasionál.

“KSDS  ko’alia kona-bá seguransa nasaun ninian oin nusa, iha asuntu oi-oin kona-bá krime siber- seguransa, krime tráfiku droga, tráfiku umanu,” PM Xanana Gusmão hateten.

Sorumutuk KSDS ne’e partisipa mós PNTL, Polísia Sientífiku Investigasaun Kriminál (PCIC), Servisu Nasionál Intelejensia Estratejika (SNIE) no mós FALINTIL-Forsa Defeza Timor-Leste.

“Ami hotu hatudu apresu ba instituisaun seguransa ne’ebé servisu di’ak hela, maibé buat sira ne’e tenke hadia nafatin, ita bele hetan situasaun di’ak tebe-tebes kona-bá seguransa Timor ninian,” Xanana hateten.

Primeiru Ministru Xanana Gusmão husu ba sidadaun hotu atu kontinua mantein situasaun hakmate no kolabora ho autoridade seguransa no parte relevamnte hotu hodi asegura Timor-leste livre husi krimé sira ne´ebé amiasa ba estabilidade nasionál. (*)