Kandidatu kadete PNTL hahú prova kultural iha Komisaun Funsaun Publika

Jornalista: Felix Fernandes

 Hatutan.com, ( 09  Outubru 2026) Díli—Kandidatu kadete Polísia Nasionál Timor-Leste (PNTL), hahú tuir prova kultural ne’ebé hala’o iha Komisaun Funsaun Publika (KFP).

Kandidatu kadete PNTL tuir prova kultural iha KFP hahú husi loron 08 to’o loron 21 Outubru 2026. Foto/Felix Fernandes

Prezidente Juri Rekrutamentu PNTL 2026,  Komisáriu Asistente Polísia José Soares, konfirma katak tuir diploma ministeriál nian, kandidatu ajente foun sira ne’ebé selesionadu iha prova kultural tenki tenke valor minimu  67.

“Valor minimu ba iha prova kultural nian tuir diploma ministerial nian  Númeru 39/2026 ne’e ho  valor minimu 67. Se balu pasa ho valor 100, nia mak okupa númeru primeiru, maibé la signifika nia selesionadu on aba PNTL tanba tenki enfrenta prova tuir fali mai,”  Komisáriu Asistente Polísia José Soares, Kinta (8/10/2026).

Prezidente Juri Rekrutamentu ne’e hatutan tan katak, remata prova kultural hafoin imprime rezultadu ne’ebé husi KFP no halo nota akompañamentu hodi taka kada munisípiu sira antes loron lima hafoin taka sai ezame psikolojia nian

Iha sorin seluk, Komisária Funsaun Publika, Anita Tavares Soares Ribeiro epslika, ho sistema KFP bele garante prosesu teste prova kultural nian ba kadete foun PNTL fó garantia katak prova ne’e hala’o ho transparénsia,  efisensia no efikás.

“KFP nia prosesu ne’ebé iha tiha ona sistema ida ne’e utiliza ona, la’ós foun foin mak atu utiliza mézmu instituisaun ida ne’e ho nia estatutu diferente mais hakarak utiliza sistema ida ne ‘e atu garante prosesu bele iha transparánsia, efisénsia no efikás ba iha prosesu sira ne’e ,“ Anita Tavares Soares Ribeiro hateten.

Tuir oráriu  prova kultural ba kandidatu kadete  PNTL ba tinan  2026 ne’e hahú husi loron 08 to’o  loron 21 fulan-Outubru, tinan ne’e. ba faze dahuluk nian kadete sira husi Munisípiu Aileu ho Ainaro. (*)