Kandidatu traballadór Timor-oan 90.000 ho estatutu iha sistema standby atu ba Austrália

Jornalista: Maria Angelita Sandi Belo

 Hatutam.com, (9 Outubro 2026), Díli– Diretór Jerál Sekretária Estadu  Formasaun Profisionál no Empregu (SEFOPE), Carlito do Fosario Cabral, informa kandidatu sira ne’ebé hetan ona númeru referénsia no rejistu iha sistema sei tama iha estatutu standby, ne’e signifika katak sira prontu atu hein oportunidade selesaun husi kompanñia ka empregadór sira iha Austrália.

Diretór Jerál SEFOPE, Carlito do Fosario Cabral. Foto/Maria Angelita Sandi Belo

“Ita nia maluk sira ne’e prontu hela. Sira ne’ebé hetan tiha ona númeru referensia ne’e signifika iha tiha ona sistema palm nian para hein de’it la’os pendente, sira ne’e ita bolu standby  katak bainhira kompañia hili sira, la’os SEFOPE mak hili, maibé kompañia mak hili sira mak SEFOPE fasilita hodi kontaktu sira para mai tuir fali prosesu entrevista  ho ingles, teste saúde, teste fízika, ne’ebé kompañia mak halo direitamente ba ita nia traballadór ka ba  kandidatus sira,” Diretór Jerál SEFOPE, Carlito do Fosario Cabral  hateten ba jornalista sira, Kinta (8/10/2026).

Kandidatu sira ne’ebé hetan ona númeru referénsia iha Sistema, sira iha ona prosesu rejistu, maibé sira hein de’it bainhira kompañia hili atu kontinua ho prosesu rekrutamentu.

Maski kandidatu sira hetan ona númeru referénsia, funsionáriu sira iha Direksaun Nasionál Empregu Estranjeiru kontinua halo verifikasaun ba perfil kandidatu sira nian ne’ebé rejista iha sistema. Verifikasaun ne’e inklui koñesimentu, kapasidade no abilidade lian Inglés, atu identifika área ne’ebé kandidatu sira presiza hadi’a molok tama ba prosesu seleksaun.

Durante kandidatu sira hein oportunidade entrevista, SEFOPE bele fasilita formasaun adisionál, inklui formasaun lian Inglés, liu husi parseiru sira.

Durasaun formasaun bele to’o fulan tolu ka liu tan, depende ba programa no nesesidade kandidatu sira.

“Durante formasaun mak kompañia bolu sira bele ba tuir entrevista no prosesu ne’ebé mak kompañia rasik halo, desizaun atu foti ka la foti ne’e depois entrevista ne’e iha kompañia ka empregadór sira, ami labele tama dehan tenki foti ka tenki hili ida ne’e, ami laiha kompeténsia tanba kompañia rasik mai ho nia rekizitu,” nia hateten.

Se kompañia hakarak hili ema ho altura 170 cm, no sira hakarak ema ho idade 24 tenki iha fíziku ne’ebé mak di’ak entaun SEFOPE fó ema barak ba mak sira hili rasik tanba área ne’ebé traballadór sira servisu ba la hanesan. (*)