Segunda, Timor-Leste hala’o ezame nasionál ba estudante finalista nivel sekundáriu

Jornalista: Felix Fernandes 

Hatutan.com, (17 Outubru 2026), Díli—Timor-Leste, Segunda (19/10/2026), ofisialmente sei hala’o ezame nasionál ba estudante finalista nivel sekundiáriu jeral, tekniku vokasionál ho ekivalensia hamutuk na’in-51.188.  

Ministra Edukasaun, Dulce de Jesus, distribuí matéria ezame nasionál ba kada munisípiu, Sesta (16/10/2026). Foto/Hatutan.com

Iha lansamentu distribuisaun materiál ezame nasionál, Sesta 16 Outubru 2026, foin palais ne’e,  Ministra Edukasaun Dulce de Jesus husu ba Diretór Servisu Edukasaun Munisipál sira, atu halo koordenasaun di’ak ba simu no distribui materiál ezame iha munisípiu ida-idak, no asegura katak prosesu tomak la’o tuir kalendáriu no prosedimentu ne’ebé estabelese ona.

“Ha’u hein katak Diretór Servisu Edukasaun Munisipál, Superintendente Eskolár, Inspetór Eskolár, dirijente eskolár no funsionáriu hotu sei serbisu hamutuk ho koordenasaun neʼebé di’ak, atu etapa preparasaun no ezekusaun ezame la’o tuir responsabilidade ida-idak nian,” Ministra Dulce de Jesus, hateten iha sentru imprensaun Díli.

Nia mós alerta ba direjente sira hotu katak tuir Lei no kalendáriu eskolár, semana ezame ida-ne’e la interfere ho lala’ok pre-eskolár no Ensinu Báziku siklu da-1 no da-2. Semana oin la’ós ferias.

Ba Inspetór Eskolár sira, Ministra husu atu hala’o monitorizasaun ho ativu no objetividade, verifika prontidaun fatin ezame nian no haree se prosedimentu sira implementa tuir regra. Problema, situasaun ne’ebé la tuir regra ka violasaun ruma tenke fó auto se presiza no relata lalais ba autoridade kompetente atu bele halo akompañamentu no rezolve ho apropriadu.

Konteudu ezame nasionál uza prova hakerek ho pergunta eskolla múltipla. Disiplina sira sujeita ba ezame nasional depende ba nivel no modalidade ensinu. Siklu 3.º Ensino Básiku, Matemátika, Inglés, Portugés, Istória no Jeografia, Siénsia Fíziku-Naturál no Tetun.

Ba Programa Nasionál Ekivalénsia ba Ensino Básiku (PNEEB) ne’e Matemátika, Inglés, Portugés, Siénsia Sosiál, Siénsia Naturál no Tetun.

Ensinu Sekundáriu Jerál – Siénsia no Teknolojia (CT) matéria Matemátika, Inglés, Portugés, Kímika, Biolojia, Fízika no Tetun.

Ensino Sekundáriu Jerál – Siénsia Sosiál no Umanidades (CSH), matéria Ekonómia no Métodu Kuantitativu, Inglés, Portugés, Istória, Sosiolojia, Jeografia no Tetun. (*)