PM Xanana lansa fatuk inan ba projetu estrada Letefoho-Atsabe-Bobonaro

Jornalista: Felix Fernandes

Hatutan.com, (30 Outubru 2026), Atsabe—Primeiru-Ministru (PM), Kay  Rala Xanana Gusmão hamutuk ho entidade relevante sira, Sesta (30/10/2026), halo lansamentu hodi hatuur fatuk inan ba projetu konstrusaun estrada husi Postu Administrativu Letefoho ba Postu Administrativu Atsabe-Ermera no liubá Postu Administrativu Bobonaro.

PM Xanana Gusmão hatuur fatuk inan ba projetu estrada Letefoho-Atsabe no Bobonaro, Sesta (30/10/2026). Foto/Espesiál

Iha lansamentu fatuk dahuluk ne’e PM  Xanana Gusmao hateten   iha planu estratéjika desvolvimentu tinan 2011/2030 hatuur ona saida mak Timor-Leste atu bele dezenvolve tanba infraestutura bázika ne’e baze ba dezenvolvimentu.

“Infraestrutura bázika katak baze ba dezenvolvimentu iha ita nia rain, primeiru mak estrada, ponte no estrada la’ós iha nasionál de’it, estrada rejionál husi munisípiu sira ba to’o postu no suku sira no to’o fatin área remota sira, hodi nune’e komunidade sira hodi asesu ba merkadu,edukasaun no  saúde, ho di’ak,” PM Xanana Gusmão hateten iha nia intervensaun.

Xefe ezekutivu ne’e hatutan se mak kaer kuidadu ho osan povu nian ne’e, tanba ukun rasik ne’e ema barak mak terus hamalaha, moras no balun lakon família, no barak mak mate ona, la husu buat ida. Ho nune’e, labele haluhan katuas ho ferik sira nebé mak sei moris tanba sira nia luta durante tinan 24 nia laran mak foin sosa Timor-Leste nia osan tua iha fundu petroleum.

Biban ne’e, Ministru Obras Públika, Samuel Marçal hatutan tan katak, Estrada la’ós mai mesak, maibé estrada sei fasilita buat hotu-hotu no ekonomia sei buras, tanba ne’e husu komunidade sira nia kontribuisaun no koopera ho kompañia ne’ebé halo konstrusaun ba estrada ne’e,

“Obra ne’e ita hotu-hotu nian, la’ós ema ida nian  tanba  ne’e ita hotu tenki  tau matan no kontribuisaun tanba onbra ne’e halo presiza material sira hanesan fatuk rai-henek tanba ne’e husu imi hotu nia kontribuisaun no kolaborasaun, atu nune’e, obra ne’e bele la’o lalais,” Ministru Samuel Marçal hateten.

Projetu konstrusaun ba estrada ne’ebé ligasaun postu administrativu Letefoho ba postu administrativu Atsabe no Lourba ho orsamentu hamutuk millaun 43 USD no Obra ne’e kaer husi kompañia Shanghai Construction Group Co.Ltd Xina   no projetu konstrusaun ne sei konklui iha tinan rua nia laran. (*)