Hautan.com, (17 Novembru 2026), Díli — Autoridade Timor-Leste, Tersa madrugada (17/11/2026), hale’u tuku 03:00 Otl, halo apreensaun ba sasán merkadoria ilísitu, hanesan sigaru marka Marlboro karton 149 ne’ebé alegadamente hatama husi kandidatu Prezidente Repúblika (PR) períodu 2027-2032 nia oan hamutuk ho membru FALINTIL-Forsa Defeza Timor-Leste (F-FDTL) ida no autór na’in-haat seluk tan.
Polísia asegura ona sasan evidénsia hanesan sigaru Marlboro karton 149 ho karreta box ida no triton ida ne’ebé autór sira utiliza hodi halo atividade markadoria ilísitu, Tersa (17/11/2026).
Liuhusi Operasaun Konjunta ne’ebé envolve Autoridade Aduáneira (AA), Diresaun Servisu Investigasaun Kriminál (DSIK), Diresaun Servisu Informasaun Polísia (DSIP), Polísia Nasionál Timor-Leste (PNTL), Polísia Sientífika Investigasaun Kriminál (PCIC), D2 F-FDTL, S2 Unidade FALINTIL-F-FDTL, N2 Komponente Naval no Servisu Nasionál Intelijénsia no Estratéjia (SNIE) deteta atividade merkadoria ilísitu ne’e iha área tasi Kristu Rei nian bainhira autór sira, kompostu husi ema na’in-neen hasai husi ró laran tula ba karreta box ida.
Iha terrenu, autoridade sira ka ekipa operasaun konjunta asegura kedas prova sira, hanesan sigaru Marlboro karton 149, karreta box ida no karreta triton ida ne’ebé transporta kombustivel atesta ba ró ida ne’ebé lori sasán ilísitu ne’e mai Timor-Leste.
Ekipa konjunta mós asegura suspeitu na’in-tolu; na’in-ida kandidatu PR periódu 2027-2032 nia oan, na’in-ida membru F-FDTL no na’in-ida seluk tan, maibé na’in-tolu seluk lakohi koopera no halai lakon.
Advertisement
Ekipa operasaun konjunta la konsege hetan ró ne’e tanba bainhira ekipa konjunta too fatin tranzasaun sasán ilísitu sira-ne’e, ró ne’e laiha ona fatin.
Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, tun direta ba konfirma akontesimetu ne’e iha Edifisiu Diresaun Servisu Investigasaun Kriminál (DSIK), orienta kedas Polísia atu kaptura autór sira ne’ebé envolve iha atividade merkadoria ilisitu ne’e hodi prosesa tuir lei mak vigora.
Komisáriu Asistente Polísia Afonso dos Santos kondena maka’ás aktu autór sira nian ne’e no nia konsidera autór ne’ebé alegadamente kandidatu PR ida0nia oan nia hahalok ne’e la bele tolera tanba bele afeta maka’ás ba integridade autór nia aman nian.
“Asuntu sira hanesan ne’e la’ós uza katuas sira nia naran, katuas sira ne’e lakohi haree buat sira ne’e. Ne’e atetude la di’ak,” Komisáriu Asistente Polísia Afonso dos Santos hateten ho hirus.
“Lalika ko’alia bara-barak, orsida katuas sira mak kona fali. O nia oan ka saida, o halo buat ida ilegal ne’e la merese. Imi sita hanesan ne’e, ha’u kontenti, sira mós labele mangoña tun mangoña sa’e, lalika dehan veteranu nia oan, nia mak sala kaer, katuas boot sira la haruka sira halo buat ne’e,” Komisáriu Asistente Polísia Afonso dos Santos hateten.
Iha fatin hanesan, Xefe Operasaun Konjunta José Sarmento Freitas haktuir apreensaun akontese dadeersan madrugada tuku 03:00 OTL iha área Kristu Rei.
“Ohin dadersan, hale’u tuku 03:00 Otl, ekipa vizilansia operasaun konjunta halo monitorizasaun, halo observasun no halo atuasaun ba merkadoria ilísitu hanesan sigaru ne’ebé ró ilegal husi tasi-laran mai iha área Kristu Rei nian no konsege ekipa halo apreensaun bá merkadoria ilísitu sira sigaru marka Marlboro,” Xefe Operasaun Konjunta José Sarmento Freitas informa ba jornalista sira.
Husi sorin seluk, portavos komandu PNTL, Superintendente-Xefe Polísia Joáo Belo dos Reis, hateten iha operasaun ne’e konsege deteta sidadaun Timor-Leste na’in-neen, na’in-tolu konsege halai na’in-tolu kaptura iha fatin ne’ebé halo hela kontra bandu ba merkadu ilísitu hanesan sigaru Marlboro.
“Ita bele hato’o katak sira na’in-neen ne’ebé mak ita deskonfia envolve kontra bandu ne’e mai husi família koñesidu balun, no membru instituisaun balun ne’ebé agora dadaun prosesu identifikasaun la’o. Depois nia prosesu tomak karik posivel ami sei públika ba maluk sira bainhira hetan ona ninia verdade,” hatete Superintendente Xefe Polísia João Belo dos Reis.
Advertisement
Nia konsdiera aktu ida-ne’e konsidera flagrante delitu tanba atividade ilísitu la’o hela nune’e sei submete ba 72 oras molok kontinua prosesu ba Ministériu Públiku no Tribunál.
Sasán ne’ebé ekipa konjunta halo apreensaun ne’e tanba la priense rekizitu rejime kontrolu tabaku Dekretu-Lei 14/2016. (*)