Francisco Kalbuadi Lay lidera kompetisaun Asean Football Federation

Hatutan.com, (22 Setembru 2021), Díli—Eis Prezidente Federasaun Futeból Timor-Leste (FFTL), Francisco Kalbuadi Lay,  oras ne’e, hetan fiar nu’udar prezidente ba  kompetisaun Asean Football Federation  (AFF) to’o tinan 2023.

Francisco Kalbuadi Lay, tersa (21/09/2021), lidera enkontru virtuál nasaun sira Asian nian hodi finaliza kompetisaun AFF Suzuki Cup 2020 ne’ebé sei hala’o iha loron 01 fulan-Dezembru 2021.

Iha entrevista direta ho Hatutan.com via telefónika, kuarta (22/09/2021), Francisco Kalbuadi Lay, informa,  horiseik tama ona faze final dada sorteiu  ba nasaun-11 ne’ebé nasaun sira hotu partisipa liuhosi enkontru virtuál ka zoom.

“Timor-Leste tenke liu lai hosi pra-kualifikasaun sei joga ho Brunei Darussalam. Se maka manan, nia kualifika kedas ba grupu A,”  Francisco Kalbuadi Lay hateten.

Nu’udar Timor-oan Francisco Kalbuadi Lay kontente no onra tebetebes nu’udar prezidente kompetisaun AFF nian to’o 2023 no  mezmu iha situasaun global  pandemia  COVID-19, maibé bele realiza duni ona kompetisaun AFF 2020 ne’e.

“Kontente mós Timor bele partisipa,”  hateten Francisco Kalbuadi Lay.  Nia hatutan, nasaun sira ne’ebé partisipa iha jogu ne’e hamutuk 11 no  nasaun sia (9) tama ona iha grupu A ho B enkuantu Timor-Leste ho Brunei Darussalam tenke tuir play of hodi avansa ba grupu.

Nasaun sira ne’ebé tama ona grupu rua (2) maka hanesan grupu A nasaun lima; Tailándia, Filipina, Myanmar, Singapura no ida maka entre Timor-Leste ka Brunei Darussalam. Grupu B mós nasaun lima hanesan, Indonézia, Malázia, Vietname, Cambodia no Laos. (bit)