EUA Oferese Pfizer BioNTech Doze 100.620 ba TL

Hatutan.com (18 Outubru 2021), Díli—Governu Timor-Leste (TL) simu ona totál vasina Covid-19 Pfizer BioNTech doze 100.620 doasaun hosi Estadus Unidus Am’erika (EUA).

COVAX Facility transporta vasina Covid-19 Pfizer BioNTech doze 100.620, bainhira to’o iha Aeroportu Internasionál Nicolau Lobato, Sábadu (16/10/21). Foto/média UNICEF iha TL.

Vasina Pfizer BioNTech sei uza ba vasina labarik-sira entre tinan 17 mai karaik, aliñadu ho desizaun Governu TL ba implementasaun vasinasaun ba labarik-sira.

Ho kontribuisaun billaun $4 ba akizisaun no transportasaun vasina-sira, EUA mak doadór bo’ot liu ba COVAX Facility.

Lote vasina Covid-19 Pfizer BioNTech ofisialmente entrega ona hosi Enkarregadu asuntu-sira EUA nian iha TL, Tom Daley  ho Reprezentativu UNICEF Bilal Durrani, ba Ministra Saúde, Odete Maria Freitas Belo, iha serimónia ne’ebé hala’o iha Armazén Sentrál Serbisu Autónomu Medikamentu no Ekipamentu Saúde (SAMES) iha Dili, Segunda (18/10/21).

COVAX pilár vasina Aseleradór ba Asesu ferramentu Covid-19 (ACT sigla Inglés), hanaran kolideradu hosi Coalition for Epidemic Preparedness (CEPI sigla Inglés) Aliansa ba Vasina (GAVI sigla Inglés) no Organizasaun Mundiál Saúde (OMS) – parseria ho UNICEF hanesan parseiru implementadora, nune’e mós organizasaun sosiedade sivíl-sira, fábrika vasina-sira, Banku Mundiál no sira seluk.

COVAX Advance Market Commitment (AMC sigla Inglés) halo tuir resposta multilaterál ba krize pandemia, aumenta esperiénsia ajénsia bilateral-sira, rekursu doadór-sira, no kompromisu país reseptór-sira, hodi apoia asesu ekuitativu globál ba vasina Covid-19.

“EUA hamutuk ho TL hanesan amigu no parseiru duradoura, bainhira ami serbisu hodi kombate hasoru Covid-19. Remesa ohin loron hatudu ami-nia apoiu ba Governu nia esforsu-sira hodi salva moris iha Timor-Leste – partikularmente ba labarik sira hosi tinan 12 ka liu. Ami orgullu hodi disponibiliza vasina sira tamba ne’e buat loos ida atu hapara pandemia ne’e no impulsiona rekuperasaun ekonomia,” Enkaregadu Asuntus sira EUA, Tom Daley, hateten.

Doze 200.620 ne’ebé entrega hosi Governu EUA hanesan parte doze-sira vasina Covid-19 alokadu hosi COVAX Facility ba TL.

COVAX mak parseiru ida apoia hela Governu-sira iha mundu, hodi prepara no implementa kampaña vasinasaun Covid-19.

Iha Timor-Leste, UNICEF no OMS apoia ona Governu Timor-Leste ba implementasaun planu nasionál ba vasinasaun.

“Doasaun hosi Governu EUA ne’e fundamentál tebes ba ita-nia esforsu, hodi vasina labarik-sira no proteze sira hosi impaktu Covid-19 mak todan,” Odete Maria Freitas Belo, hateten.

Fasilidade COVAX no provizaun vasina apoia ona hosi jenerozidade finansiamentu hosi Governu Austrália, Bhutan, Canada, Colombia, Republika Korea, Kuwait, Monaco, New Zealand, Qatar, Saude Arabia, Singapore, Team Europe, United Kindom, Estadu Unidu Amerika no doador noinstituisaun lubuk lubuk ida.

To’o horisehik, TL rejista ona kazu  ativu Covid-19 hamutuk 99 mai hosi kapitál Dili na’in 53, no Komisaun Nasionál ba Prevensaun Covid-19 rejista kazu ema mate ho Covid-19 hamutuk 119 desde inisiu surtu ne’e akontese no mós totál númeru kumulativu rejistadu iha TL hamutuk 19.714.

Tuir atualizasaun hosi pájina ofisiál dadus estatístika Covid-19 mundiál hatudu katak, Covid-19 hamate ona ema iha mundu tomak hamutuk 4.891.684 no mós ema millaun 240-resin mak infetadu.

Marka prezensa mós iha eventu ne’e Reprezentativu Organizasaun Mundial Saúde (OMS), Arvin Mathur, Koordenadór Rezidente ONU, Roy Trivedy,  ofisiál-sira hosi Ministériu Negósiu Estranjeiru no Kooperasaun no Ministériu Saúde.

Jornalista: Carmelita Isaac