Hatutan.com, (30 Outubru 2021), Dili—Prezidente Repúblika (PR), Francisco Guterres Lú Olo, lori Estadu Timor-Leste (TL) nia naran no ninia an rasik hato’o sentidas kondolénsias ba Conferência Episcopal de Timor-Leste, Igreja Katólika, no família direta saudozu Reverendíssimu Bispu Basílio do Nascimento no ba kompatriotas no amigu hotu ne’ebé mak besik.
Maktoban Dom Basilio do Nascimento, bainhira hala’o audiénsia ho Prezidente Repúblika (PR), Francisco Guterres Lú Olo. Foto/Média PR.
“Conferência Episcopal de Timor-Leste lakon nia membru ida no ita nia País lakon patriota ida ho formasaun intelektuál exelente,” Prezidente Repúblika hato’o mensajen, liu hosi komunikadu, Sesta (30/10/21).
Prezidente Repúbilka hakruk ba memória Ema Igreja nian, ne’ebé iha momentu difiseis iha perkursu luta ba libertasaun nasionál, hatene halibur irmãos no irmãs hotu-hotu, ho aten brani, luta ba afirmasaun nu’udár Povu no Nasaun, iha Frente Armada, Klandestina no Esterna ka Diplomátika.
Advertisement
“Merese temi ho espesiál ba Dom Basílio de Nascimento nia apoiu ne’ebé labele nega ba Frente Armada, liuhusi dalan klandestinus,” Xefe Estadu afirma.
Prezidente Repúblika hato’o Deskanse ho paz ba Dom Basílio do Nascimento, ne’ebé ohin, iis-kotu iha Hospital Nasionál Guido Valadares (HNGV) ho moras cardiovascular.