Eis Embaixadór TL ba Malázia Djafar Alkatiri Husik-iis Tanba Diabetes

Hatutan.com (10 Novembru 2021), Díli—Eis embaixadór Timor-Leste (TL) ba Malázia, Djafar Bim Hamut Alkatiri, husik-iis iha Hospital Sangla Bali Indonézia, iha 09 Novembru 2021, tanba sofre moras diabetes.

Matebian, Eis embaixadór Timor-Leste (TL) ba Malázia, Djafar Bim Hamut Alkatiri. Foto dok Privadu Família matebian.

Antes ne’e, matebian hala’o uluk tratamentu iha Klínika privada Maternidade Fatumeta, Dili, no halo transferénsia ba Bali iha Sábadu 06 Novembru 2021.

Informasaun hosi parte familia katak, durante hala’o tratamentu iha Dili no Bali Indonezia, mediku sira fo diagnosa ba matebian, katak, sofre moras diabetes ka raan midar.

Transladasaun mate-isin hosi Bali Indonézia mai Timor-Leste, to’o iha Aeroportu Timor iha loron 10 fulan ne’e, tuku 12:00 otl, ho Air Asia.

Família matebian no marka mós prezensa hosi atuál Vise Primeiru Ministru, José Maria dos Reis, Ministru Edukasaun, Juventude no Desportu Armindo Maia no sarani Muslumana iha TL akompaña mate-isin to’o iha rezidénsia Fatuhada.

Iha rezidénsia hala’o serimónia tuir rituál Muslumana, hanesan reza no serimónia despedida familia ho matebian.

Tuir oráriu funerál, ohin família sei lori mate-isin ba iha Masjid Annur Kampung-Alor atu hasa’e orasaun ikus nian hamutuk ho matebian, no sei ba haloot iha semitériu Muslumana iha Taibesi.

Matebian Djafar Bim Hamut Alkatiri husik-iis ho idade 74. Matebian hanesan oan hosi Hamut bin Awat Alkatiri ho Fatmah Binti Marí Alkatiri.

Matebian Kaben ho Bachitah Binti Said Alkatiri ne’ebé iha oan na’in neen mak hanesan Nur, Yaser, Sami, Dila, Najib ho Hamut, no  iha ona beioan hamutuk na’in 10.

Matebian hanesan membru Comite Central FRETILIN (CCF) iha tinan 1975. Vise Departementu Saúde no Hijiene Populár no Lokutór Rádiu Maubere iha tinan 1975.

Alende ne’e, hanesan membru CCF iha períudu Reorganizasaun FRETILIN no sai mós Embaixadór Repúblika Demokratíka Timor Leste (RDTL) ba Malázia iha tinan 2002.

Jornalista: Carmelita Isaac