Hatutan.com, (14 Novembru 2021), Díli-Tribunál Distritál Díli (TDD) liuhusi primeiru interrogatóriu, Domingu (14/11/2921), aplika medida koasaun prizaun preventiva ba funsionáriu públiku nain-ida ho inisiál SS husi Ministériu Obras Públika (MOP) arguidu no arguidu seluk ho inisiál R nu’udar sidadaun estranjeiru.
Arguidu na’in-haat ho inisiál S, AB, SS no UPS, ne’ebé deskonfia halo falsifikasaun dokumentu iha Ministériu Obras Públika (MOP), submete ba inkéritu iha Tribunál Distritál Dili (TDD). Foto/Hatutan.com.
Arguidu na’in-rua seluk ho inisiál UPS nu’udar sidadaun Indonézia no arguidu AB, nu’udar mós funsionáriu públiku husi MOP, Tribunál aplika medida koasaun aprezentasaun periódika no proibisaun auzénsia hodi aprezenta-aan kada semana no prende mós arguidu nia pasaporte.
Razaun Tribunál aplika medida koasaun ne’ebé diferente ba arguidu na’in-haat, tanba arguidu na’in-rua SS, R iha indísiu forte ba krime refere.
Advertisement
Ba arguidu na’in-rua seluk UPS ho AB Tribunal aplika aprezentasaun periódika no proibisaun auzénsia hodi asegura arguidu sira nia prezensa durante prosesu investigasaun.
Advogadu privadu Fernando da Costa ne’ebé fó asisténsia ba arguidu SS no R, la aseita ho medida koasaun ne’ebé Tribunál aplika ba nia kliente, tanba krime ne’ebé MP akuza ba nia kliente seidauk ezekuta foin mak inisia. Tanba ne’e, durante prazu loron 15 parte defeza sei ko’alia ho arguidu hodi hatama rekursu ba TR.
Advogadu Miguel Faria aseita ho medida koasaun ne’ebé Tribunal aplika ba nia kliente arguidu UPS, AB, tanba adekuadu.