Justisa & Krime
TDD Aplika Aprezentasaun Periódika Ba Membru Polísia Militár
Hatutan.com, (18 Novembru 2021), Díli-Tribunal Distritál Díli (TDD) liu husi primeiru interrogatóriu aplika medida koasaun aprezentasaun periódika ba membru Polísia Militár na’in-ida ho inisiál JXB, ba krime abuzu konfiansa, burla agravadu no falsifikasaun dokumentu.
Arguidu JXB sei aprezenta aan kada semana iha ninia servisu fatin Kuartél Polísia Militár, Kintal-Boot, Díli. Razaun Tribunál aplika medida koasaun ne’e, tanba iha faktu balun ne’ebé Ministériu Públiku (MP) aprezenta la dun prienxe nia rekizitu ba krime ne’e, ho nune’e, TDD deside aplika medida koasaun ne’e hodi hein prosesu investigasaun.
Defensor Públiku, Humberto Alves aseita ho medida koasaun ne’e hodi asegura arguidu nia prezensa durante prosesu investigasaun.
MP promove arguidu ba krime abuzu konfiansa, burla agravadu no falsifikasaun dokumentu, relasiona kontratu ka akordu entre kompañia rua Jeckliver Unipesoal Lda no Roman Unipesoal Lda ne’ebé halo husi arguidu nia ferik-oan.
Audiénsia ba primeiru interrogatóriu prezide husi juis singular Evangelino Belo, MP reprezenta husi Prokuradór Domingos Barreto no arguidu hetan asisténsia legal husi Defensoria Públiku Humberto Alves.
Jornalista: Carmelita Isaac