Hatutan.com, (19 Novembru 2021) Díli-Governu mobiliza daudaun nia rekursu tékniku no orsamentu Estadu atu buka solusaun ba situasaun no problema inundasaun ne’ebé sempre akontese iha Aeroportu Internasionál Prezidente Nicolau Lobato bainhira tempu udan.
Notísia iha Relasaun : Inundasaun iha Aeroportu Comoro, Citilink “Hakdasak” Oras Ida
Ministru Transporte no Komunikasaun, José Agostinho, hateten daudaun ne’e tékniku komesa servisu maka’as hodi antesipa bainhira mobilizasaun finanseira lao ona.
“Oinsá bele responde ba situasaun ne’e karik iha udan liu-liu inundasaun iha aeroportu iha tempu udan, entaun planu ne’e tenke integradu no daudaun iha planu nia laran liu-liu iha área aeroportu no konstrusaun ne’e mak tenke haree didi’ak hodi antesipa no labele rezultadu konstrusaun finaliza ona mak iha akontesimentu hanesan inundasaun,” Ministru José Agostinho responde Hatutan.com, iha Díli, Sesta (19/11/2021).
Difikuldade ne’ebé hasoru mak bainhira konstrusaun atu lao presiza tempu, hanoin no osan barak, tanba ne’e presiza liña koordenasaun interministeriál entre tékniku ne’ebé kompostu husi MTK, ANATL, Ministériu Finansa , Ministériu Negósiu Estranjeiru no Kooperasaun (MNEK), Ministériu Obras Publika, Ministériu Administrasaun Estatál (MAE) ho Ministériu Justisa (MJ), nune’e bele prodús dokumentu ne’ebé di’ak hodi sai baze no prienxe padraun aeroportu internasionál.
Daudaun ne’e, iha aeroportu Dili mós bele atende situasaun emerjénsia sira hanesan iha tempu kalan, aviaun bele tun tanba lampu pista funsiona ho di’ak ho durasaun tempu ne’ebé naruk.
Kona-ba kondisaun Aeroportu Kay Rala Xanana Gusmão, Suai, Covalima, Ministru José Agostinho hateten, aeroportu ne’e nia kondisaun di’ak no bele responde ba situasaun emerjénsia sira.
Ministru Transporte no Komunikasaun (MTK) rekoñese iha tinan ida-ne’e movimentasaun transporte aero ladún másimu tanba impaktu husi pandemia Covid-19 ne’ebé afeta mós ba reseita.
Durante ne’e ANATL moris ho reseita ne’ebé mai husi movimentasaun transporte aero, maibé difikuldade ne’ebé durante ne’e enfrenta mak movimentasaun mínimu liu tanba kanais reseita ne’ebé daudaun funsiona iha ualu (8) de’it.
“Ita iha planu ne’ebé implementa husi ANATL rasik ne’ebé iha kanais de reseita por volta de 23 e tal kanais, maibe daudaun funsiona ualu de’it, tanba movimentu fraku tanba pandemia Covid-19 ne’ebé afeta mós ba reseita,” nia tenik.
Jornalista : Carmelita Isaac
