Situasaun Rai-Laran Di’ak Hela

Hatutan.com, (24 Novembru 2021), Díli-Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, afirma katak mezmu akontese problema entre grupu juventude sira iha Munisípiu Baucau no fatin seluk tan, maibé jerálmente situasaun rai-laran di’ak hela.  

Notísia iha Relasaun: Lere La Hakfodak ho Joven Sira Oho-Malu iha Baucau

Tenente Jenerál Lere Anan Timur hateten,  dala-ruma iha Munisípiu Baucau, joven sira hatudu hela sira nia “muturabu”, hanesan sunu-uma, baku-malu, no iha kapitál Díli rasik ema lansa rama-ambon, maibé situasaun rai-laran jerálmente di’ak hela.

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur. Foto/Hatutan.com

“Ha’u hasoru Prezidente Repúblika,  hanesan enkontru regular  ami nian ho Komandante Supremu Forsa Armada hodi  mai informa liu-liu kona-ba situasaun forsas armadas nian, kona-ba situasaun rai-laran, no kona-ba atividade forsa ninia. Relasaun ho situasaun rai-laran, situasaun di’ak hela,” Tenente Jenerál Lere Anan Timur, hateten ba jornalista sira hafoin hasoru malu  ho Prezidente Repúblika, Francisco Guterres “Lú-Olo”, iha Palásiu Prezidente, Díli, Kuarta (24/11/2021).

Kona-bá situasaun seguransa  iha fronteira mós tuir Tenente Jenerál Lere Anan Timur, la’o hanesan baibain no oras ne’e besik ona ba tinan ikus 2021 depois mós 2022 sei iha eleisaun prezidensiál, forsa ho polisia, tenke prepara halo oinsá mak bele asegura TL nia eventu sira ne’e.

Maske situasaun iha Baucau rasik, ema hotu sente dehan ta’uk, maibé oras ne’e governu halo ona preparasaun atu selebra loron proklamasaun independénsia, 28 novembru 2021. Tanba ne’e, laiha ema ida mak atu impede fali serimónia Estadu nian.

“Ha’u dehan, serimónia Estadu nian ne’e sé se de’it mak halo mós, estadu halo nafatin. O bele monta kañaun, morteiru ka supersóniku mós, estadu nia serimónia tenke halo nafatin. Ne’e maka ha’u hanoin katak, dia 28 Novembru halo iha Munisípiu Baucau, no forsas armadas sei garante seguransa. Ida-ne’e maka ha’u informa ba Prezidente Repúblika,” Lere Anan Timur, hateten.

Kona-bá preparasaun koloka membru F-FDTL  iha liña fronteira, Lere informa, oras ne’e la’o namanas hela, maibé membru hira mak atu destaka nia laiha koñesimentu.

“Agora, ida-ne’e ha’u lahatene, ne’e ema pesoál mak hatene. Ha’u ne’e dehan haruka ema ba de’it, na’in hira ne’e ha’u lahatene,” Tenente Jenerál Lere esplika.

Durante enkontru, PR “Lú-Olo”, husu ba Tenente Jenerál Lere Anan Timur, ne’ebé nu’udár komandante ba forsas armadas iha kampu tátika operasionál, atu tau matan didi’ak ba forsa sira, komanda ho didi’ak, no nafatin mantein dixiplina.

Jornalista: Rogério Cárceres