PM Taur “Hirus” Komisaun Organizadora ba Semináriu Avaliasaun Projetu

Hatutan.com, (30 Novembru 2021), Dili—Primeiru Ministru (PM), Taur Matan Ruak, hirus Komisaun Organizadora ba Semináriu kona-bá Rezultadu Avaliasaun Ex-Post ba Projetu Infraestrutura iha Timor-Leste (TL), ne’ebé hala’o iha Minsitériu Finansa, Ai-Tarak Laran.

Primeiru Ministru (PM), Taur Matan Ruak. Foto/GPM

Tuir ajenda, iha Tersa tuku 10:00, Primeiru-Ministru, Taur Matan Ruak hetan konvite hodi partisipa iha Semináriu kona-bá asuntu Rezultadu Avaliasaun Ex-Post ba Projetus Infraestruturas iha TL, infelismente iha oras mensionadu, PM Taur iha ona fatin, maibé Komisaun Organizadora laiha fatin, no Xefe Governu tenke tuur mesak hodi hein durante minutu 20.

Tuir observasaun jornalista Hatutan.com, katak, bainhira PM Taur to’o iha fatina, ekipa Komisaun Organizadora hosi Ministériu Planeamentu Ordenamentu, hamutuk ho membru Governu ne’ebe partisipa iha serimónia ne’e hala’o hela matabixu iha fatin ne’ebé prepara.

Tanba ne’e, antes PM hato’o ninia diskursu iha semináriu ne’e, PM husu ba Komisaun Organizadora atu tau atensaun ba oras ne’ebé determina ona.

“Ha’u simu konvite hosi Vise PM, maski ha’u iha reuniaun ida ba preparasaun Orsamentu Jerál Estadu aban. Tanba ne’e, ha’u la gosta, bainhira ha’u to’o iha ne’e ita boot sira ba han fali, enkuantu ha’u mai tuur mesak fali. Tanba ne’e, ha’u husu ba Komisaun Organizadora atu tau atensaun,” Taur Matan Ruak fó atensaun molok hato’o diskursu, abertura.

Relasiona ho preokupasaun ne’e, jornalista halo duni konfirmasaun ho Ministru Planeamentu Ordenamentu hanesan mós vise Primeiru Ministru, José Reis, iha salaun Ministériu Finansa (MF), maibé nia parte hili nonok.

Jornalista: Carmelita Isaac