Hatutan.com, (01 Dezembru 2021), Dili—Konsellu Ministru (KM) aprova projetu deliberasaun, kona-bá ezonerasaun no nomeasaun Xefe Estadu-Maiór Forsa Armada (XEMFA), no Komandante Komponente FALINTIL Forsa Defeza Timor Leste (F-FDTL) sira.
Projetu deliberasaun ne’e aprezenta hosi Primeiru-Ministru (PM) Taur Matan Ruak, hamutuk ho Ministru Defeza (MD), Filomeno da Paixão de Jesus, iha Palásiu Governu, Dili, Kuarta, (01/12/2021).
“Proposta refere propoin ezonerasaun no nomeasaun ne’e sei submete ba aprovasaun hosi Prezidente Repúblika (PR), Francisco Guterres Lú Olo,” Komunikadu hosi Gabinete Primeiru Ministru (GPM).
Konsellu Ministru mós aprova alterasaun ba Dekretu Governu kona-bá Regulamentu Internu hosi Komisaun ba Asuntu Tasi, ne’ebé aprezenta hosi Ministru Defeza, Filomeno da Paixào de Jesus.
Projetu Governu ne’e mai hafoin aprovasaun Dekretu-Lei nu. 39/2020, loron 23 fulan-Setembru, ne’ebé kria Sistema Auditoria Marítima (SAM), no prevee ba Komisaun ba Asuntu Tasi, hanesan órgaun ne’ebé iha kompeténsia hodi ezerse kontrolu polítiku ne’ebé efetivu kona-bá atuasaun Autoridade Marítima Nasionál.
Ikusliu, Konsellu Ministru aprova projetu Dekretu-Lei Governu kona-bá Sentru Akollimentu Multifunsaun (SAMF), ne’ebé aprezenta hosi Ministru Administrasaun Estatál, Miguel Pereira de Carvalho.
Sentru akollimentu sira ne’e maka destina ba alojamentu temporáriu ba vitíma asidente grave no katástrofe sira.
Jornalista: Carmelita Isaac
