Mudansa Lideransa iha Forsa Armada, MD Hein Aprovasaun Xefe Estadu

Hatutan.com, (02 Dezembru 2021), Dili—Ministru Defeza (MD), Filomeno da Paixão de Jesus sei hein desizaun hosi Xefe Estadu, Francisco Guterres Lú Olo nian, relasiona ho aprovasaun Konsellu Ministru (KM) ba projetu deliberasaun, kona-bá ezonerasaun no nomeasaun Xefe Estadu-Maiór Forsa Armada (XEMFA), no Komandante Komponente FALINTIL Forsa Defeza Timor-Leste (F-FDTL).

Ministru Defeza (MD), Filomeno da Paixão de Jesus. Foto/Hatutan.com.

Filomeno da Paixão de Jesus esplika, tuir lei no estatutu militár katak, mandatu ba Diretór Institutu Defeza Nasional (IDN) ho durasaun másimu tinan rua.

Notísia iha Relasaun:KM Aprova Projetu Deliberasaun ba Ezonerasaun-Nomeasaun Xefe Estadu Maiór Forsa Armada

Tamba ne’e, Ministru Defeza husu atu Konsellu Ministru aprova projetu deliberasaun kona-bá nomeasaun no ezonerasaun hodi halo mudansa iha kargu xefia sira iha instituisaun F-FDTL.

“Komodoro Donanciano da Costa Gomes ‘Pedro Klamar Fuik’ iha IDN liu ona tinan 10, tanba ne’e ita husu atu halo mudansa,” Filomeno da Paixão de Jesus  hateten ba jornalista-sira iha Parlamentu Nasionál (PN) Kinta (02/12/21).

Tuir proposta ne’ebé iha, MD propoin ba Xefe Estadu atu promove Komodoro Donanciano da Costa Gomes ‘Pedro Klamar Fuik’ ba Xefe Estadu Maiór bazeia ba proposta ne’ebé hetan aprovasaun hosi KM.

“Klamar Fuik ba fali Xefe Estadu Maiór maibé desizaun iha Prezidente Repúblika,” Ministru Defeza akresenta.

MD seidauk pronunsia kandidatu sira ba kargu Xefia iha intituisaun F-FDTL nia laran, tanba Prezidente Repúblika seidauk hola desizaun bazeia ba proposta Konsellu Ministru-nian.

“Buat troka-malu ne’e normal. Ne’ebé, laiha ezonerasaun, despromosaun tanba komandante komponente sira troka hotu, tanba mandatu tinan rua-rua de’it. Ne’ebé imi hein de’it Prezidente anunsia mak imi husu fali mai ha’u,” nia hateten ba jornalista sira.

Ministru Defeza mós informa ona ba parte hotu-hotu kona-bá mudansa iha instituisaun forsa armada nia laran liu hosi reuniaun Konsellu Militár no Defeza, tanba ne’e se de’it tenke kumpre ba desizaun.

Jornalista: Vito Salvadór