Hatutan.com (03 Dezembru 2021) Díli — Estadu Repúblika Populár Xina ho Estadu Timor-Leste kontinua hametin liu tán kooperasaun bilaterál.
Embaixadór Repúblika Populár Xina iha Timor-Leste Xiao Jianguo hasoru malu ho Prezidente Repúblika (PR), Francisco Guterres Lú Olo, iha Palásiu Prezidensiál Nicolau Lobato, Díli, Sesta (03/12/21). Foto/Média PR.
“Nu’udár Prezidente Repúblika, ha’u hakarak hato’o agradesimentu boot ba apoiu sira ne’ebé Repúblika Populár Xina halo ona ba povu TL, iha momentu akontese inundasaun no pandemia Covid-19. Povu TL konsege halo vasina tanba apoiu mai hosi nasaun lubuk ida, inklui Xina no sei buka dalan oioin atu hametin liután kooperasaun,” Prezidente Repúblika (PR), Francisco Guterres Lú Olo hateten liu hosi komunikadu iha Palásiu Prezidensiál Nicolau Lobato, Díli, (03/12/21).
Prezidente Repúblika, Francisco Guterres Lú Olo, agradese apoiu sira ne’ebé Governu Repúblika Populár Xina halo ona mai Timor-Leste, liuliu iha tempu difísil hanesan krize saúde públika ne’ebé akontese tanba pandemia Covid-19 no inundasaun ne’ebé akontese iha tinan kotuk.
Embaixadór Repúblika Populár Xina iha Timor-Leste Xiao Jianguo transmite Prezidente Repúblika Xi Jinping nia fesilitasaun ba Prezidente Repúblika Francisco Guterres Lú-Olo.
Iha audiénsia ne’e, Embaixadór relata kooperasaun ne’ebé hala’o iha Timor-Leste, iha área edukasaun, saúde, agrikultura ne’ebé estabelese tiha ona.
Ba oin Xina sei tau prioridade sira ne’ebé konsentra ba grupu vulnerável sira no kontinua apoiu setór seguransa no defeza, agrikultura, saúde no infraestrutura.
Ba prevensaun no kontrolu Covid-19, Governu Xina fó apoiu rihun 100 vasina Sinovac no ekipamentu saúde iha luta hasoru pandemia.
Xina manifesta nia prontidaun atu haree posibilidade ba oin ho vasina ba terseira doze.
Jornalista: Rogério Pereira Cárceres