Assalam FC Preparadu, AD SLB Laulara “La Mosu” iha Konferénsia Imprensa

Hatutan.com (09 Dezembru 2021), Díli—Assalam FC iha ona preparasaun másimu enfrenta jogu kontra adversáriu AD SLB Laulara FC, iha jornada da-lima Liga Futeból Timor-Leste (LFTL), Kinta (10/12/2021).

Ekipa Assalam FC. Foto/LFTL.

Assalam FC oras-ne’e okupa pozisaun da-lima iha tabela klasifikasaun provizóriu LFTL ho pontu  tolu hosi jogu haat manán ida no lakon tolu, enkuantu AD SLB Laulara FC okupa pozisaun da-toluk ho pontu neen hosi jogu haat manán ida no impata tolu.

Notísia iha Relasaun:Emanuel FC Kampiaun ba Segunda Divizaun LFTL Époka 2021

Treinadór Assalam FC Adu Marques hateten, Assalam FC iha ona preparasaun máximu ba jogu kontra adversariu AD SLB Laulara FC tanba ne’e garante sei rekolla pontu tolu.

“AD SLB Laulara mós nu’udár klube di’ak la halimar iha Liga Futeból Timor Leste no iha estoke jogadór ne’ebé di’ak. Tanba ne’e, ami iha preparasaun di’ak atu bele hasoru sira no garante ami sei manán,” Adu Marques  hateten iha edifísiu LFTL Bairro dos Grilhos Díli, Kinta (09/12/2021).

Treinadór ne’e informa katak, hafoin joga hasoru DIT FC iha semana rua ba kotuk, Assalam FC iha tempu sufisiente halo preparasaun no rekopera fíziku jogadór sira-nian, nune’e garante ekipa Assalam FC iha kondisaun forte 100%.

Assalam FC sei hakonu jogu klaran ho avansadu atu halo atake barak, nune’e bele rekolla vitória ba klube ne’e.

“Ami nia jogu aban la iha opsaun atu lakon, ami tenke manán tanba ne’e ami sei hadi’a liña hotu no tau prioridade ba jogu iha liña avansadu atu prodús golu ba ekipa no hetan vitória,” Adu Marques komenta.

Assalam FC konsidera jogu hotu-hotu ne’ebé ekipa ne’e enfrenta importante, nune’e sei esforsu atu rekolla vitória no lori ekipa ne’e ba iha zona seguru iha tabela klasifikasaun LFTL no mantein iha primeira divizaun.

Ohin, parte AD SLB Laulara FC la marka prezensa iha konferénsia imprensa ne’e ho motivu la klaru tanba la fó razaun ba ekipa tékniku LFTL relasiona ho auzénsia.

Jornalista: Vito Salvadór