Justisa & Krime
CAC Investiga Arguidu 38 no Identifika Poténsia Prezuiju ba Estadu $1.964.963,81
Hatutan.com, (13 Dezembru 2021), Díli—Comissão Anti Corrupção (CAC) liu hosi Diresaun Investigasaun Kriminál, públika relatóriu investigasaun kriminál hahú hosi fulan Janeiru to’o Novembru 2021, konsege investiga sasin hamutuk na’in 250 no arguidu na’in 38.
Plaka CAC. Foto/Média CAC.
Hosi rezultadu investigasaun kriminál ba kazu indikasaun korrupsaun ne’e, CAC identifika mós osan ho montante $1.964.963,81 ne’ebé ho ninia previzun poténsia ba prezuiju Estadu.
Notísia iha Relasaun:CAC Kontinua Buka-Tuir Irregularidade Hosi Kazu Ró Tranship II
Totál keixa komunidade nian ka públiku hamutuk 68. Husi totál keixa hirak-ne’e hafoin investigadór CAC nian klasifika, kazu hamutuk 22 tama ba kompeténsia CAC nian.
“Nune’e, CAC halo auto-partisipasaun ba iha Ministériu Públiku (MP), hodi hetan delegasaun kompeténsia molok hahú prosesu investigasaun kriminál iha territóriu Timor laran tomak,” Diretór Jerál Diresaun Investigasaun Kriminal CAC, José Verdiál, relata liu hosi komunikadu.
Kazu 46 seluk hosi komunidade keixadáor-sira ne’ebé la tama iha kompeténsia CAC nian, Komisaun haruka fali ba iha instituisaun kompetente tuir atribuisaun lejislasaun hodi kontinua prosesa.
Iha fulan Janeiru–Novembru tinan 2021, investigadór CAC nian rekolla rasik kazu hamutuk 11 iha ne’ebé kazu hirak ne’e iha indísiu krime korrupsaun hamutuk ne’en (6) no kazu lima (5) seluk la iha indisiu krime korrupsaun.
Komisaun mós atende totál kazu husi keixadór, averigua no buka tuir hamutuk 28. Kazu hamutuk 16 Komisaun submete ka remesa ona ba iha MP hodi analiza no haree ninia indisiu krime sira molok kontinua prosesu.
Daudaun ne’e, Komisaun hala’o hela akompañamentu no buka informasaun ho ninia indisiu sira hamutuk kazu 12.
Janeiru–Novembru tinan ne’e, CAC simu delegasaun kompeténsia hamutuk 70 hosi Ministériu Públiku iha ne’ebé CAC finaliza ona ninia prosesu investigasaun, hodi submete hikas ba MP hamutuk kazu 25 molok lori ba tribunál hodi halo julgamentu.
Komisaun liu hosi investigadór nu’udár Espesialista Anti-Korrupsaun (EAK) oras-ne’e sei iha faze prosesu investigasaun ba kazu hamutuk 45.
Hosi totál kazu ne’ebé Komisaun investiga, EAK bolu testemuña hamutuk na’in 250 no arguidu hamutuk 38.
Jornalista: Vito Salvadór