Xefe Estadu Promulga Dekretu-Lei Ne’ebé Benefisia Família ho Rendimentu Kiik

Hatutan.com, (14 Dezembru 2021), Díli—Prezidente Repúblika (PR), Francisco Guterres Lú Olo promulga ona Dekretu-Lei atu implementa  medida seguransa alimentár previstu  iha Lei n°8/2021, 3 maiu, ne’ebé  altera Lei n° 14/2020, 29 dezembru, refere ba Orsamentu Jerál Estadu 2021 no aprovasaun medidas ba apoiu sósiu-ekonómiku.

Prezidente Repúblika (PR), Francisco Guterres Lú Olo. Foto/Média PR.

Haree ba impaktu negativu hosi pandemia Covid-19 iha ekonomia nasionál mak Governu propoin alterasaun ba lei 14/2020 ho medidas foun oioin, inklui medida seguransa alimentár.

Notísia iha Relasaun:KM Aprova Projetu Dekretu Lei Neen ho Estatutu Orgániku F-FDTL

Lei ne’e fó kbiit ba Centro Lojístiku Nasionál (CLN), atu halo kontratu ho produtór lokál ka ho operadór komersiál sira seluk ho hetan ai-han nesesáriu hodi fahe  ba ita-nia  ema no família sira ho rendimemtu kiik tebes.

Liuhosi sosa ai-han, liuliu hosi ita-nia agrikultor sira hodi fahe ba ita-nia ema no família vulnerável liu, Estadu Timor-Leste insentiva ita-nia produtór sira atu hasa’e sira-nia produsaun no nune’e, kontribui ba família agrikultór sira hodi moris-di’ak liu.

Tanba fahe produtu hosi agrikultor sira família timoroan sira ne’ebé vulnerável liu, Estadu Timor-Leste hatudu katak tau duni matan ba ita-nia ema iha tempu susar. 

“Dekretu-Lei ida ne’e fó atensaun espesiál ba ita ema no família sira ho rendimentu laliu dólar amerikanu 1.90 loron ida,” Komunikadu hosi Palásiu Prezidensiál Nicolau Lobato, Díli, (13/12/2021).

Atu define sesé mak iha direitu ba apoiu espesiál ida ne’e, entidade  responsável sira  sei uza dadus hosi rejistu uma-ka’in ida-idak iha suku ida-idak hosi Ministériu Administrasaun Estatal no hosi Ministériu Solidariedade Sosiál no Inkluzaun.

Ai-han ho valór dólar amerikanu tolu nulu ($30) se fó ba sidadaun ka sidadã ne’ebé rejista-an iha “Livru Rejistu  Uma-Ka’in” nu’udár Xefe família ka, bainhira labele  simu, sei  reprezenta hosi membru ida hosi Uma-Ka’in ne’e, ho otas 17  ba leten.

Medida ida ne’e sei implementa ho osan hosi Fundo Covid-19 ne’ebé tama iha Orsamentu Jerál Estadu no sei implementa to’o 31 Dezembru 2021 maibé MECAE bele hatutan tan.

Diploma ne’e aprova iha Konsellu Ministru (KM) iha 27 Outubru 2021, tama iha Prezidénsia Repúblika iha 8 Novembru 2021 no Prezidente Repúblika promulga iha 10 Dezembru 2021.

Ministru Koordenadór ba Asuntu Ekonómiku, Ministru Finansa, Ministru Admnistrasaun Estatál no Ministra Solidariedade Sosiál no Inkluzaun mak sei regulamenta Dekretu-lei  liuhosi diploma konjuntu ida kona-bá oinsá implementa hodi benefisia ita nia-ema no uma-ka’in sira ho rendimentu la liu $1.90 loron ida.

Jornalista: Rogério Cárceres