Hatutan.com, (15 Janeiru 2022), Díli—Servisu Rejistu Notariadu Munisípiu Lautém, Baucau ho Manatuto daudaun ne’e seidauk bele imprimi Billete Identidade (BI) orijinál, tanba mákina imprimi ho naran Vargo sei avaria desde tinan 2021 no seidauk hetan manutensaun.
Parte tékniku Diresaun Servisu Rejistu Notariadu hosi Munisípiu tolu ne’e, fasilita nafatin produsaun BI maibé uza surat tahan mutin no bainhira hakarak Billete Identidade orijinál, tenke liu hosi Diresaun Nasionál Servisu no Rejistu Notariadu Díli.
“Iha tinan 2021 iha kompañia Timoroan ida ne’ebé ha’u la lembra naran mak halo manutensaun ba mákina vargo, maibé la konsege tanba laiha osan no prazu ezekusaun Orsamentu Jerál Estadu 2021 taka iha loron 23 Dezembru. Tanba ne’e kompañia fo fila mákina ne’e hodi rezeita manutensaun,” Diretór Jerál Diresaun Nasionál Servisu no Rejistu Notariadu (DNRN), Crisogno da Costa Neto ba Hatutan.com iha ninia knar fatin Mandarin.
Ho situasaun ne’e maka, depende ba Diresaun Aprovizionamentu atu kontinua estende ka loke fali konkursu foun liu hosi alokasaun OJE tinan 2022.
Daudaun ne’e, DNRN fó prioridade ba komunidade hosi Munisípiu tolu ne’e, hodi fasilita Billete Identidade orijinál tanba atendementu la’o normál.
Tuir dadus DNRN no rejistu Sivíl iha tinan 2021, konsege atribui BI ba ema hamutuk 40.604, Pasaporte ba ema hamutuk 10.721 kompostu hosi sidadaun estranjeiru no Timor-oan no konsege hatama ona reseita ba Estadu ho montante $705.800.
Hosi parte rejistu sivíl, konsege atribui sertidaun moris ba ema hamutuk 9.086, sertidaun kazamentu 423, sertidaun gia óbitu ba ema 908, rejistu kriminál ba ema 25.410, renovasaun rejistu kriminál ba ema 546, bulletin rejistu kriminál ema 162, ho atendimentu gratuita.
Jornalista: Carmelita Isaac
