Papél Polísia Militár atu Kontrola Membru Forsa Armada Ne’ebé Halo Krime

Hatutan.com, (17 Janeiru 2022), Díli—Papél loloos hosi Polísia Militár (PM) maka tau-matan ka kontrola membru forsa armada ne’ebé involve iha kazu krime.

Formatura Polisia Militár iha serimónia aniversáriu ba dala-17, iha Kuartél Kintál-boot, Segunda (17/01/2022). Foto/Hatutan.com.

Bainhira membru F-FDTL ho Polísia Nasionál Timor-Leste (PNTL), halo problema (baku-malu), PM mak atua.

Notisia iha Relasaun:Polísia Militár Kontinua Investiga Kazu Asidente ho Karreta F-FDTL

Iha prosesu atuasaun ne’e, PM mak sei atende no membru hosi polisia nian sei entrega ba Komandou PNTL mak responsabiliza.

“La signifika ba kaer PNTL, ba kaer sivíl, le’e. Papél PM ne’e, ba kaer de’it mak militár ne’ebé kuandu halo krime, depois prosesa. Restu ne’e, entrega ba PNTL mak responsabiliza. Ida ne’e mak ami nia papél,” Komandante PM, Majór de Infantaria, Abel da Costa Xavier “Niki” hateten ba Hatutan.com, hafoin serimónia aniversáriu PM ba dala-17, iha kuartél Kintál-boot, Segunda (17/01/2022).

Prosesu ba membru F-FDTL ne’ebé involve iha kazu krime sira ne’e, tenke la’o tuir regulamentu Dixiplinár Militár (RDM).

Regulamentu ida-ne’e, aplika ba membru hotu-hotu iha instituisaun F-FDTL tomak, mak hanesan, Komponente Navál, Terrestre, Aéreo, inklui membru sira PM rasik.

“Sé de’it mak tama ona forsa, regulamentu ida-ne’e mak regula. Sala, hatama nia iha sela. Prosesu, sela nafatin, depois kuandu sala boot, hasai tiha hosi tropa,” maijór “Niki”, esplika.

Durante tinan 2020 to’o 2021, Polisia Militár la rejista membru ruma mak involve iha infrasaun, tanba pandemia Covid-19, hodi halo ema hotu, liu-liu juventude, seguransa ho defeza mós hakmatek.

“Infrasaun laiha, maibé iha forsa balun mak falta, halai hosi servisu, lanu ami kaer, ida ne’e mak iha. Infrasaun boot laiha,” Maijór Niki, afirma tán.

Problema Rekuru Umanu

Komandu F-FDTL, harii unidade PM iha 17 Janeiru 2005. Maske kompleta ona tinan 17, iha 17 janeiru 2022, maibé rekursu umanu, nafatin sai problema boot.

Majór de Infantaria, Abel da Costa Xavier “Niki” dehan, probelam rekursu umanu ne’e, la’ós de’it iha PM, maibé unidade no komponente hotu-hotu iha komandu F-FDTL nia laran, inklui problema iha lojístika no infraestrutura.

Kona-bá karreta, mós realidade oras-ne’e karreta Estadu sira hotu-hotu hakne’ak hotu, hakdasak, lori ain-tolu mak la’o.

“Rekursu umanu ne’e presija ba tuir formasaun iha rai-laran no estranjeiru, ne’e tenke halo,” Majór Niki, subliña.

Maski antes ne’e, membru na’in-rua mak ba partisipa ona formasaun militár iha nasaun Japaun, maibé sira ne’e fila hotu ona mai Timor-Leste, no hetan ona promosaun diviza ba ofisiál.

Rekruta Pelutaun ida

PM planeia ona katak, iha tempu badak sei rekruta tán membru foun hamutuk na’in-tolu nulu (30) ka pelutaun ida, hodi hasa’e númeru efetivu iha PM.

Membru sira ne’e mak oras ne’e tuir hela formasaun militár iha Centro de Formação e Terreno (CFT), Nicolau dos Reis Lobato, iha Metinaro.

“Efetivu oitoan de’it, presija aumetan tán. Tenke forma to’o batallaun ida. Tanba agora, foin mak kompañia de’it. Maibé, atu forma batallaun ne’e, tenke kompañia tolu ka haat. Ita foin ida, ne’ebé presija mais efetivu ne’e aumenta tán,” Niki, hateten.

Oras ne’e, totál efetivu iha unidade Polisia Militár hamutuk na’in 162, maibé iha tinan 2021, membru na’in-lima mak lakon vida (mate).

Jornalista: Rogério Pereira Cárceres