Defeza & Seguransa

PNTL Detein Autór Na’in-Ualu hosi Insidente Salaun Mahoka

Published

on

Hatutan.com, (17 Janeiru 2022), Díli—Polísia Nasionál Timor-Leste (PNTL), Komandu Munisípiu Díli Eskuadra Dom Aleixo, hamutuk ho forsa rezerva kaptura ona autór hamutuk na’in-ualu, ligadu ba insidente ne’ebé mosu iha Salaun Rudal 7984 “Mauhoka”, iha área Osindo.

PNTL hala’o seguransa iha estrada públiku hodi asegura movimentu transporte iha misa kalan, 24 Dezembru 2021 iha Kapitál Díli. Foto/Media PNTL.

Komandante PNTL Munisípiu Díli, Superintendente Xefe Polísia, Hendrique da Costa hateten atendimentu Polísia nian ba insidente ne’e, tarde oitoan, tanba iha kalan ne’ebé hanesan, Polísia hala’o hela atendimentu ba kazu asaltu-malu ne’ebé mosuiha área Osindo nian duni.

“Ita identifika autór na’in-ualu no lori ba iha eskuadra Dom Aleixo hodi halo prosesu. Ita nia parte investigasaun atende hela iha ne’e no sei halo tuir servisu investigasaun ninian, depois hodi kontinua ba iha Ministériu Públiku,” Superintendente Xefe Polísia, Hendrique da Costa, hateten ba jornalista sira iha Komando Caicoli, Segunda (17/01/2022).

Motivu hosi insidente ne’e, primeiru tanba hemu-tua lanu, segundu, liga ho Grupu Arte Marsiál (GAM), no oras ne’e prosesu investigasaun la’o hela iha eskuadra Dom Aleixo, hodi buka tuir motivu loloos.

Advertisement

Insidente ne’e, envolve hosi konvidadu sira ne’ebé hetan konvite, hodi ba partisipa iha festa graduasaun ne’ebé realiza hosi graduadu balun hosi universidade balun iha Dili, iha Sesta 14 Janeiru 2022.

Jornalista: Rogério Pereira Cárceres   

Husik Hela Komentariu

Your email address will not be published. Required fields are marked *

Trending

Exit mobile version