Atleta Ski TL Yohan Gonçalves Sei Joga iha Winter Olímpiku Xina 2022

Hatutan.com, (19 Janeiru 2022), Díli—Atleta Ski Timor-oan, Yohan Goutt Gonçalves sei partisipa iha modalidade ski iha Beijing Xina, ne’ebé sei joga iha loron 16 to’o 19 Fevereiru 2022.

Atleta Ski Timor-oan, Yohan Goutt Gonçalves. Foto/Doc Privado Yohan Goutt Gonçalves.

“Atleta Timor-oan ne’e sei tama iha olimpic village iha loron rua Fevereiru, hodi partisipa mós iha abertura serimónia ne’ebé sei hala’o iha loron 4 Fevereiru. Hosi França Yohan Gonçalves sei vou diretamente ba iha Xina,” Seketáriu Estadu Juventude no Desportu (SEJD), Abrão Nokosiku Saldanha hateten iha komunikadu ne’ebé Hatutan.com sita.

Notisia iha Relasaun:Atleta Ski TL Yohan Gonçalves Kualifikadu ba Jogu Olímpico  

Abrão Nokosiku Saldanha  husu Timor-oan hotu nia apoiu ba Yohan Goutt Gonçalves nia partisipasaun hodi reprezenta Timor-oan hotu nia orgullu, atu konkretiza mehi ne’ebé iha.

Embaixadór Xina iha TL, Xiao Jiangou hateten Xina prontu atu simu atleta sira hotu ba eventu ne’e ho akomodasaun tomak, ne’ebé preparadu no husu Guverno TL hamutuk ho Komité Olímpico Nasionál TL nian haruka atleta Timor-oan partisipa iha Winter Olimpico Beijing ne’e.

Atleta Ski Timor Leste Yohan Goutt Gonçalves partisipa iha jogu Winter Olimpico iha Fevereiru tinan 2022 iha Beijing, kapital Xina ne’e, hafoin hetan Billete ba winter olimpico iha kompetisaun kurrida internasionál ski Dubai iha loron 17-18 fulan Novembro 2021.

Delegasaun TL nian ne’ebé sei dezloka ba Xina kompostu hosi xefe delegasaun ida, médiku ida, treinadór ida, ofisiál ida, atleta ida no hosi Komité olímpiku na’in-rua.

Jornalista: Cipriano Colo