Armanda Fiar an Avansa ba Kandidatura Prezidensiál 2022-2027

Hatutan.com, (20 Janeiru 2022), Díli—Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos, ofisialmente deklara nia kandidatura ba iha eleisaun Prezidensiál 2022-2027.

Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos. Foto/Hatutan.com.

Molok Prezidente Partidu KHUNTO deklara nia kandidatura, ekipa susesu ne’ebé lidera husi Marito Magno, deklara kandidatura ne’e hetan apoiu hosi militante no organizasaun afiliadus hosi munisípiu 12 inklui Rejiaun Administrativa Espasiál Oecuse Amebno (RAEOA), liu hosi konferénsia nasionál Partidu KHUNTO.

Notisia iha Relasaun:Martinho Gusmão Deklara Ofisialmente Kandidata an ba Prezidente Repúblika 2022-2027

“Konferénsia partidu nian mak fó kbiit no beran ba ita nia kandidata atu avansa iha eleisaun Prezidensiál no provizoriamente ita iha apoiantes 10.000-resin mai hosi organizasaun filiál sira no individu balun ne’ebé simpatia ho ita nia kandidatura,” Marito Magno deklara, iha Salaun Esperansa Elemloi, kinta, (20/01/2022).

Prezidente Partidu KHUNTO Armanda Berta dos Santos iha nia deklarasaun, hateten hakarak ofisializa kandidatura ba públiku hodi kompete iha eleisaun Prezidensiál no iha fiar, domin no esperansa hakarak servi povu iha nasaun ida-ne’e.

“Ha’u prontu atu servi povu no nasaun doben ida ne’e,” Armanda Berta dos Santos deklara ho fiar an.

Kandidatura partidu KHUNTO ne’e hatutan, iha tinan sira ikus Timor-Leste hasoru difikuldade tanba impaktu hosi pandemia Covid-19, ne’ebé afeita ba ekonomia nasaun nian no lori mós risku ba saúde públika sidadaun nian, ne’ebé ikus mai TL mós rejista númeru mortalidade ligadu ho Covid-19.

Sei esforsu hamutuk ho povu atu liberta sidadaun sira hosi situasaun krize sira ne’e, hodi hasoru festa demokrasia ho ksolok.

Armanda Berta dos Santos  agradese ba feto maluk sira hotu ne’ebé iha vontade atu apoia nia kandidatura hodi sai Prezidente atu servi sidadaun sira iha nasaun  ne’e.

Tamba ne’e, kompromete atu hakruuk de’it ba konstituisaun no prinsípiu fundamentál sira hodi hametin Estadu direitu demokrátiku, pás no estabilidade, hodi mantein relasaun di’ak hodi habelar politika esterna nian.

Prezidente partidu KHUNTO ne’e mos iha kompromisu politika ho militante no simpatizante sira, karik mak eleitu hanesan Prezidente Repúblika sei deklara rezigna an hosi kargu partidu KHUNTO atu servi nasaun no povu independentemente.

Nune’e mós Konsileiru supremu Partidu KHUNTO, José dos Santos Naimori Bucar hateten Prezidente Partidu KHUNTO nia kandidatura hetan apoiu másimu hosi estrutura, kuadru inklui militante no simpatizante liu husi konferénsia nasionál ne’ebé realiza iha 2021.

Jornalista: Vito Salvadór