Implementasaun Fibra Óptika, Governu Analiza Hela Dokumentu Hosi Empreza Haat  

Hatutan.com, (24 Janeiru 2022), Díli— Governu Timor-Leste (TL) hala’o hela analiza no estudu tékniku ba dokumentu hosi empreza nasionál no internasionál hamutuk haat, ne’ebé sei hetan legalizasaun no aprovasaun ikus iha Konsellu Ministru (KM) molok implementa projetu ‘Fíbra Optica’ mai TL.

Ministru Koordenadór Asuntu Ekonómiku (MKAE), Joaquim Amaral. Foto/MKAE.

Empreza haat ne’e mak hanesan Sacom Tel, Metrolindo, Moratelindo no mós Telekom Indonézia internasionál.

Ministru Koordenadór ba Assuntu Ekonómiku (MKAE), Joaquim Amaral hamutuk ho Ministru Transporte Komunikasaun (MTK), José Agustinho da Silva, aprezenta ona prosesu no progressu ne’e ba Primeiru-Ministru (PM), Taur Matan Ruak.

“Ita iha investidór potensiál haat ne’ebé hatama sira nia proposta no Governu halo hela analiza hamutuk ho ekipa tékniku sira. Proposta ne’e konstitui investimentu estratéjiku ba ita-nia nasaun, nune’e obrigasaun Ministériu kompetente ba matéria ne’e  atu atualiza progresu  servisu ba Primeiru Ministru,” Joaquim Amaral  hateten iha Palásiu Governu, Segunda (24/01/2022).

Faze dahuluk atu dada investidór sira, TL rasik tenke prepara uluk kondisaun hanesan infraestrutura sira tenke  prepara mais kompetetivu.

Kona ba ne’e, Primeiru Ministru mós fó nia apoiu tomak no husu atu Ministériu sira kontinua servisu hamutuk hodi aselera prosesu ne’e.

Jornalista: Vito Salvadór