Rejistadu, Assanami ho Rogério Lobato Preparadu ba Kampaña

Hatutan.com (02 Janeiru 2022) Díli—Kandidatu Pezidente Repúblika ba períudu tinan 2022-2027, hosi Partidu Demokratiku (PD), Mariano Asanami Sabino rejistadu iha Tribunál Rekursu (TR).

Kartaun Eleitorál apaoiante kandidatu Prezidente Repúblika hosi Partidu Demokratiku (PD), Mariano Assanami Sabino. Foto/Média PD.

Asanami rejistadu, hafoin submete dokumentu hanesan karta deklarasaun no aseitasaun hosi kandidatu nian, karta designasaun reprezentante, dokumentu komprovativu hanesan lista asinatura, kartaun eleitorál hosi apoiantes rihun 10resin.

Notisia iha Relasaun:Kandidatu Lere Rejistadu ho Proponente 9.000

Rejistu no submisaun dokumentu hosi kandidatu Mariano Asanami Sabino ne’e, reprezenta hosi ekipa susesu, António da Conceição iha tuku 14:00 lorokraik.

“Ohin PD mai ofisializa no rejista ona kandidatu PR Mariano Asanami Sabino, hodi submete ona dokumentu ne’ebé nesesita atu kompleta rekejitu hodi sai nu’udár kandidatu. Ami hein notifikasaun hosi TR, karik sei iha buat ruma ne’ebé presija kompleta,” Portavóz ekipa susesu hateten iha TR, Kuarta (02/2/2022).

Tuir ajenda hosi ekipa susesu katak, abertura kompaña ba kandidatu ne’e, sei realiza iha Munisípiu Lautém.

Iha oras ne’ebé diferente tuku 15:00 kandidatu independente Rogério Tiago Lobato mós submete dokumentu ho apoiantes 6.000-resin.

“Ohin mai rejista ona ami nia kandidatura independente ho proponente 6.000-resin no ami prepara a’an atu avansa ba kompaña eleitorál,” Portavóz ekipa susesu, Mateus Maia de Jesus hateten.

Daudaun ne’e Tribunál Rekursu (TR) rejista no halo ona verifikasaun ba kandidatura hamutuk na’in 11.

“Totál kandidatura ne’ebé mai ona iha ne’e to’o loron ohin hamutuk na’in 11 no verifikasaun hala’o iha ne’e. Husu mós apoiu hosi STAE, tanba TR laiha kondisaun, tanba ne’e hosi totál prosesu lista kandidatura na’in 11 ne’e,” Prezidente TR Deolindo dos Santos, hateten.

Iha kandidatu na’in-hitu mak haruka ona ba STAE hodi halo verifikasaun iha sistema kona-bá proponentes ne’ebé kada kandidatu hatama liu-liu kona-bá idade to’o ona atu sai proponente ka la’e no balun mate ona, maibé kartaun eleitorál sei iha, no iha kandidatu na’in-haat  maka STAE haruka ona mai TR.

Prosesu rejistrasaun iha TR ne’e hahú iha loron 17 Janeiru no sei remata iha loron 04 fulan ne’e, iha oras tuku 17:00 lokraik, no sei iha prazu loron 10 TR sei foti desizaun kona-bá kandidatura ne’ebé prienxe kritériu hodi admite no sei konkorre iha eleisaun Prezidensiál no hirak ne’ebé la admitidu iha direitu atu rekorre.

To’o loron 02 fulan Fevereiru tinan 2022, kandidatura hamutuk na’in-11 mak rejistadu iha TR, kompostu hosi kandidatu hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN Francisco Guterres Luo-Olo, Partidu PD Mariano Asanami Sabino, kandidatu independente kompostu hosi Felisberto Araújo Duarte, Milena Pires Angela Freitas, Isabel Fereira, Hermes da Rosa Correia Barros, Lere Anan Timur no Rogério Tiago Lobato.

Jornalista: Carmelita/Vito