TL Tenke Hatudu Prestasaun iha Sea Games Vietnam

Hatutan.com, (05 Fevereiru 2022), Díli-Sekretáriu Estadu Juventude no Desportu (SEJD), Abrão Saldanha,  Sábadu (05/02/2022), ofisiálmente halo lansamentu preparasaun atleta Timor-Leste ba partisipa iha Sea Games Vietnam 2021 iha sidade Hanoi.

Timor-Leste hahú halo preparasaun ba partisipa iha Sea Games Vietnam 2021 iha sidade Hanoi. Foto/Hatutan.com

SEJD Abrão Saldanha iha nia diskursu hateten, Timor-Leste hahú nia preparasaun  ne’e atu bele hatudu prestasaun.

“Ita para ona ho liafuan partisipasaun, maibé tenke hatudu prestasaun.” Abrão Saldanha haktuir hodi hateten tan, eventu lansamentu preparasaun atleta ne’e importante ba partisipasaun iha kontinjente Timor-Leste nian ba eventu rejionál Sea Games iha Vietnam.

Preparasaun ida-ne’e, tuir Abrão Saldanha,  atu hatudu ezisténsia povu no Estadu Timor-Leste nian ba nasaun seluk iha sudeste aziátiku, tamba ne’e, la’ós atu partisipa de’it, maibé tenke hatudu prestasaun.

Sea Games Vietnam 2021 ne’ebé foin hala’o tinan ne’e tamba impaktu husi COVID-19. Nune’e, Timor-Leste sei reprezenta atleta husi federasaun hitu (7) ho modalidade ualu (8) hanesan Atletizmu Taekwondo, Boxing, Bodi Building, Halterofilismo, Futebol, Natasaun no Karatedo ho total atleta na’in-54.

SEJD Abrão Saldanha rekoñese iha federasaun balun hahú tiha ona preparasaun ba atleta sira no SEJD hamutuk ho Konfederasaun Desportu Timor Leste (CDTL) no Comite Olímpio Nasional Timor-Leste (CONTL) foin hahú lansamentu ba preparasaun nian atu hatudu seriedade kontinjente Timor-Leste nian iha eventu Sea Games ne’e.

“Ha’u hakarak énfaze ba Prezidente Federasaun, Treinadór no atleta sira katak númeru aumenta mak labele, maibé bele redús atu bele iha selesaun ida rigór katak se mak iha prestasaun nia mak merese atu reprezenta Timor-Leste,” nia salienta.

Nia afirma, atleta no federasaun sira ne’ebé halo preparasaun seidauk másimu no seidauk iha prestasaun halo lai preparasaun iha rai laran hodi hein oportunidade seluk. Atu nune’e, Timor-Leste nia partisipasaun iha eventu internasional no rejionál sira ne’e la’ós de’it partisipa atu prienxe rekizitu maibé bele iha prestasaun hodi hamorin Timor Leste nia naran.

Prezide CDTL, Macario F Sanches iha nia intervensaun husu atu federasaun sira halo preparasaun ida di’ák ba atleta sira atu sira iha kbiit hodi bele kompete no presta kualidade.

“Preparasaun ida-ne’e atu hatudu prova ida oinsá mak ita bele iha  kondisaun ida nu’udar prova ba prestasaun iha eventu ne’ebé ita sei partisipa,” Macario F Sanches hateten.

Timor-Leste iha poténsia atleta barak maibé sei nafatin haksumik husi sosiedade nia leet, tamba ne’e, CDTL sempre alerta ba públiku liuliu ba foin-sa’e feto no mane atu tama iha prosesu dezenvolvimentu modalidade desportu .

Vise prezidente CONTL Mateus da Cruz hateten iha delegasaun boot mak sei reprezenta kontinjente Timor-Leste nune’e husu atu atleta sira nafatin tau importánsia ba disiplina liuliu han no hemu inklui ho tempu atu nune’e labele prejudika prestasaun iha eventu ne’e.

“Delegasaun boot tamba ne’e iha dezafiu boot atu CONTL bele presta servisu di’ak ba federasaun hotu, maibé ita sei esforsu  posibilidade hotu atu atleta sira bele iha prestasaun.” Mateus da Cruz hateten.

Iha parte seluk atleta Karatedo, Fidelis Pedro Soares hateten, konsentrasaun ba treinamentu hahú tiha ona iha tinan kotuk, tamba ne’e, sei esforsu hodi kompete ho dignidade.

Atleta ne’e akresenta difikuldade ne’ebé enfrenta tamba dala barak liu atleta la konsentra iha fatin ida, maibé sei nafatin hela iha uma mak mai treinu nune’e difikulta mós prosesu balun ba preparasaun nian.

Treinadór Karatedo prepara namanas hela no haka’as an hodi fó treinu barak ba atleta atu iha táktika barak liután hodi faith iha eventu Sea Games Vietnam.

Karatedo rasik sei reprezenta husi atleta hamutuk na’in-lima (5), ne’ebé sei kompete iha faith haat (4) no nain ida iha jogu jurus ka fata.

Iha serimónia lansamentu no preparasaun atleta ba eventu Sea Games ne’e, SEJD atribui mos abonu ka subsídiu ba atleta sira ne’ebé hatudu prestasaun di’ak iha eventu Asean University Games, jogu CPLP, Youth Atletic Championship no border open Indonesia iha Atambua.

Jornalista: Vito Salvador