Laiha Lisensa Jogu Kuru-Kuru, TDD Aplika Pena Multa $30 Ba Arguidu Nain-rua

Hatutan.com (10 Fevereiru 2022) Díli—Tribunál Distritál Díli, Kinta (10/02/2022), liuhusi leitura sentensa ne’ebé lee sai husi juiz singular, Afonso Carmona, deside aplika pena multa ho montante $30 ba arguidu nain-rua Marito dos Santos no Tiago de Deus ba krime Esplorasaun Jogu Ilísitu tanba laiha lisensa ba jogu kuru-kuru.

TDD. Foto/Hatutan.com

Tribunál esplika katak arguidu nain-rua; kada ema sei selu multa ho montante $30, maibé la selu kustu judisiáriu tanba arguidu nain-rua hetan asisténsia legal husi Defensor Públiku (DP).

Razaun Tribunál aplika pena multa, tanba krime ne’ebé imputa ba arguidu nain-rua ho kastigu ne’ebé kaman maka seluk multa.

Tuir akuzasaun husi Ministériu Públiku (MP) katak, iha loron 31 fulan-Janeiru 2022, tuku 14:00 loraik, iha Aldeia Terra Santa, Suku Madohi, Postu Administrativu Dom Aleixu, Munisípiu Dili, ekipa PNTL halo patrullamentu no haree arguidu nain-rua joga hela kuru-kuru, Polísia tenta atu haree nia dokumentu, maibé laiha dokumentu, tanba ne’e Polísia detein arguidu nain-rua hodi foti mós sira-nia sasán hanesan meza ida no osan ho montante $21.00, tanba ne’e MP akuza arguidu nain-rua ba pratika krime Esplorasaun Jogu Ilísitu ne’ebé previstu iha artigu 322 husi kódigu penál Timor Leste.

Audiénsia julgamentu prezide husi juiz singular Afonso Carmona, MP reprezenta husi prokuradór Aderito Tilman no arguidu nain-rua hetan asisténsia legal husi Defensor Públiku, Nelson Borges.

Jornalista: Carmelita Isaac