Kandidatu PR Luis Tilman Kompleta Dokumentu ho Proponente 100-liu kada Munisípiu

Hatutan.com (15 Fevereiru 2022) Dili-Kandidatu Prezidente Repúblika (PR) períodu  2022-2027, Luis Alves Tilman, kompleta dokumentu ho lista proponente 100-liu husi Munisípiu Manufahi, Viqueque no Liquiça, bazeia ba notifikasaun ne’ebé sai husi Tribunál Rekursu (TR) iha loron 14 Fevereiru ne’e.

Notísia iha Relasaun: Kandidatu PR Na’in-16 Admitidu, Luis Tilman Presiza Kompleta Dokumentu

Kandidatu PR 2022-2027, Luis Alves Tilman. Foto/Foti husi Google

TR notifika Luis Alves Tilman tanba dokumentu ne’ebé nia submete hanesan kandidatu PR 2022-2027 seidauk kompleta rekizitu, liuliu proponente sira husi Munisípiu Manufahi, Viqueque no Liquiça ne’ebé nia proponente la to’o 100.

“Dokumentu ne’ebé ohin ami lori maka primeiru kontra desizaun PTR, segundu konklui dokumentu balun bazeia ba notifikasaun husi TR no iha Munisípiu tolu hanesan Manufahi, Viqueque no Liquiça. Ami konklui ona proponente 100-resin iha kada munisípiu tanba ne’e ami hein de’it desizaun husi TR,” portavós ekipa susesu, Francisco da Silva hateten ba jornalista sira hafoin kompleta dokumentu ba TR, Tersa (15/02/2022).

TR simu ona dokumentu husi kandidatu ne’e nian, no iha prazu loron rua nia laran liuhusi juiz koletivu sei deside hikas desizaun ba kandidatura Luis Tilman admitidu ka lae. Hafoin ne’e maka TR sei hasai lista definitivu hodi hakat ba dada númeru sorteiu kandidatu PR sira-nian ne’ebé sei hala’o iha TR.

Kandidatu PR sira ne’ebé TR notifika admitidu mak hanesan kandidatu husi partidu CNRT, José Manuel Ramos-Horta,  Armanda Berta dos Santos (KHUNTO),  Francisco Guterres “Lú Olo (Partidu FRETILIN),  Mariano Asanami Sabino (PD), Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente ne’ebé admitidu kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio da Silva Guterres “Lamukan”, Constâncio da Conceição Pinto, Antero Benedito da Silva no Martinho Germano Gusmão.

 Jornalista: Carmelita Isaac