Governu Husu Xefe Estadu Ezonera-Nomeia Komandante Komponente Sira Forsa Armada

Hatutan.com, (22 Fevereiru 2022), Díli—Konsellu Superiór Defeza no Seguransa (KSDS), hala’o reuniaun ho Prezidente Repúblika (PR), hodi diskute proposta hosi Governu kona-bá ezonerasaun no nomeasaun komandante komponente forsa Armada FALINTIL-Força de Defesa de Timor-Leste (F-FDTL).

KSDS hala’o reuniaun ho Prezidente Repúblika, hodi diskute proposta Governu kona-bá ezonerasaun no nomeasaun komandante komponente forsa Armada F-FDTL. Foto/PR.

Tuir Lei, Nomeasaun ba kargu sira iha irarkia F-FDTL nian nu’udár kompeténsia Prezidente Repúblika tuir pontu m) artigu 86 Konstitusaun Repúblika Demokratika Timor-Leste.

Notisia iha Relasaun:Lú Olo Ezonera Ona Lere husi Xefe Estadu Maiór Jenerál F-FDTL

Nune’e mós alinea e) artigu 14 Lei Defeza Nasionál (Lei Nú. 3/2010 Lei Defeza Nasional, loron 21 Abril) no artigu 74 no 75 Decreto-Lei Nú. 28/2016 de 13 de Julho Primeira Alteração ao Decreto-Lei Nú. 7/2014, de 12 de Março (Estatuto dos Militares das F-FDTL) nian.

Normalmente ezersísiu ba kargu sira iha ierarkia F-FDTL nian, tuir artigu 74 kargu CEMG F-FDTL no Vise-CEMG F-FDTL nia mandatu tinan haat no renova dala ida de’it.

Nune’e mós kargu Komandante Komponente sira tuir artigu 75 Decreto-Lei Nú. 28/2016 de 13 de Julho Primeira Alteração ao Decreto-Lei Nú. 7/2014, de 12 de Março (Estatuto dos Militares das F-FDTL) nia mandatu tinan rua no renova dala ida de’it.

Bazeia ba estatutu orgániku Forsa Armada anteriór F-FDTL iha komponente 5 hanesan komponente Aero, komponente Navál, Komponente Apoiu no servisu, komponente Terrestre no komponente Formasaun no Treino.

Enkuantu iha estatutu foun orgánika F-FDTL hela de’it komponente tolu maka Komponente Terrestre, Komponente Aero no Komponente Naval, enkuantu rua seluk nakfilak de’it ba unidade de apoiu tanba ne’e PR uza nia kompeténsia hodi halo nomeasaun ba de’it komponente tolu tuir proposta ne’ebé governu aprezenta.

Xefe Kaza Militár, Koronél António da Silva “Mau Kalo” hateten molok governu lori proposta ne’e ba iha KSDS, sei halo uluk verifikasaun ba prosedimentu legál sira ba membru ne’ebé atu nomeia.

Tuir lei, proposta ba komandu komponente hirak ne’e mai hosi komandu F-FDTL no aprezenta ba Ministru Defeza hodi halo fali konsultasaun ho Konsellu Superiór Defeza militár.

“Hosi proposta ne’ebé mai, membru KSDS hotu-hotu fó-hanoin pozitivu tanba ne’e baihira PR dekreta tia sei haruka ba komandu F-FDTL, hodi hala’o tomada de posse,” António da Silva “Mau-Kalo” hateten iha Palásiu Prezidensiál, Bairru Pité, Tersa (22/02/2022).

Komandante komponente sira ne’ebé hetan ezonerasaun hosi PR maka, Komandante Komponente Navál, Capitão de Fragata,João da Silva, Komponente Formasaun no Treino koronel Cesário Ximenes “Haksolok”, Komandante Komponente Apoiu no Servisu F-FDTL, Tanente Koronel Infantaria Armindo dos Santos Nunes, Komandante Komponente Terrestre Tenente Koronel Renilde Guterres Cortereal e Silva no komandante Komponente Aero.

PR nomeia hikas Kolonel José da Costa “Trix” ba komandante komponente Terrestre, postu Komodoro Higinio das Neves ba komandante komponente Navál no tenente kolonel Helder da Costa ba komandante komponente Aero.

Jornalista: Vito Salvadór