Konstrusaun Portu Baía Tibar Atinji 72%

Hatutan.com, (22 Fevereiru 2022), Díli—Progresu kumulativu ba konstrusaun Portu Baía Tibar to’o loron 31 Dezembru 2021 atinji ona 72%.

Progressu konstrusaun Portu Baía Tibar. Foto/MF

Governu Timor-Leste liuhusi Escrow Account Fundu Viabilidade ne’ebé jere hosi Ministériu Finansas, hahú hosi Agostu 2019 to’o Dezembru 2021, dezembolsa ona pagamentu Viability Gap Fund (VGF) ho montante millaun $84,1 ba kompaña Timor Port S.A, ne’ebé mak hanesan konsesionáriu projetu Parseria Públiku-Privada (PPP, sigla Inglés) Portu Baía Tibar.

Notisia iha Relasaun:Dezintendimentu Traballadór 21 iha Portu Tibar Rezolvidu

Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia iha servisu alfandegáriu no atividade komérsiu.

Efisiénsia hirak ne’e mós sei ajuda Governu liu hosi Ministériu Finansas atu kolekta reseitas ho lais, justu no transparente.

“Portu foun modernu ne’e sei fasilita Timor-Leste ninia konektividade marítima iha rejiaun Ázia, liga Ita-nia país ba merkadu komérsiu globál no mellora Ita-nia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun,” Hatutan.com sita deklarasaun Ministru Finansas, Rui Augusto Gomes, iha komunikadu.   

Konstrusaun Portu Baía Tibar ho modalidade PPP hosi parseria entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu hosi Bolloré ho millaun $150, hamutuk millaun $280 ba faze inísiu hosi totál investimentu estimativu millaun $500 ba tinan 30.

Daudaun ne’e, totál traballadór-sira ne’ebé mak servisu iha projetu konstrusaun Portu Baía Tibar hamutuk 949. Hosi númeru ne’e, traballadór Timoroan hamutuk 579 (61%).

Relasiona ho dezenvolvimentu konteúdu lokál, to’o iha Dezembru 2021, kompaña konstrusaun China Harbour sub-kontrata ona servisu balun ba kompaña lokál 69 ho montante millaun $21,2 no Timoroan hamutuk 392 mak servisu indereta ho kontratór hirak-ne’e.

Jornalista: Vito Salvadór