Desportu
Iha Abertura Kongresu FFTL, SEJD Hato’o Parabéns Ba Selesaun Nasionál U-23
Hatutan.com, (26 Fevereiru 2022), Díli-Sekretáriu Estadu Juventude no Desportu (SEJD), Abrão Saldanha, lori Governu nia naran hato’o parabéns ba Selesaun Nasionál U-23 ne’ebé hatudu performa di’ak durante kompetisaun Asean Football Confederation (AFC) U-23 Championship 2022 iha Cambodia.
Selesaun Nasionál U-23 iha jogu AFC Championship U-23 2022. Foto/Foti husi Google
Kongresu Federasaun Futeból Timor Leste (FFTL) ba dala-VII ne’ebé hala’o iha Novo Turismo, Dili, Sábadu (26/02/2022), SEJD Abrão Saldanha, afirma katak kongresu ne’e la’ós mai hodi hili de’it estrutura foun FFTL maibé fó mós parabéns ba selesaun nasionál U-23 ne’ebé hatudu jogu di’ak tebes iha kampeonatu rejionál ba tasa AFC U-23 championship tamba Timor Leste bele ultrapasa to’o iha semi final maske la konsege hadau billete ida ba final tamba falla iha penalidade hasoru Vietnam.
“Mezmu la hakat ba finál, maibé ne’e hatudu rezultadu pozitivu hodi lori futeból Timor-Leste iha mundu nia matan,” Abrão Saldanha hateten.
Governante ne’e hatutan, selesaun nasionál U-23 hatudu rezultadu di’ak ne’e hatudu poténsia foin-sa’e sira-nian bainhira haree didi’ak no fó espasu ba sira hodi projeta sira atu hatudu potensialidade tomak.
“Ha’u uainhira asume pasta nudár SEJD hakarak lori vizaun ida maka oinsá lori futeból ba ema hotu no haboot futeból hahú husi baze,” nia hatutan.
Sekretáriu estadu ne’e mós louva servisu hotu ne’ebé FFTL no órgaun Liga Futeból Timor Leste (LFTL) halo hodi kria kondisaun ba fini selesaun nasionál ne’ebé ho kualidade no iha potensialidade boot ba hamorin naran Timor Leste iha mundu internasionál.
Tuir oráriu jogu AFC Championship U-23 2022, Timor Leste sei joga hasoru nia adversáriu ekipa U-23 Laos iha Sábadu (26/02/2022), tuku 21:30 OTL, hodi hadau oportunidade títulu terseiru lugar AFFC Championship U-23 2022.
Jornalista: Vito Salvador