Hatutan.com, (04 Marsu 2022), Díli—Ministériu Finansas liuhusi Gabinete Apoiu Jurídiku no Diresaun Jerál Planeamentu no Orsamentu, organiza sesaun diseminasaun informasaun ba Membru Oitavu Governu Konstitusionál kona-bá Lei Enkuadramentu Orsamentál no mekanizmu elaborasaun ezbosu Lei das Grandes Opções do Plano.
Sesaun diseminasaun informasaun ba Membru Oitavu Governu Konstitusionál kona-bá Lei Enkuadramentu Orsamentál no mekanizmu elaborasaun ezbosu Lei das Grandes Opções do Plano, iha MF, Sesta (04/03/2022). Foto/MF.
“Durante sesaun diseminasaun informasaun ne’e, Koordenadór Gabinete Apoiu Jurídiku, Isaac Menezes halo aprezentasaun kona-bá komponente importante rua mak hanesan: prosesu Orsamentu Jerál Estadu no Jestaun Finanseira Públikas,” Hatutan.com sita komunikadu.
Enkuantu Diretór Jerál Planeamentu no Orsamentu, José Alexandre de Carvalho halo aprezentasaun kona-bá estratéjia no mekanizmu ba elaborasaun Lei das Grandes Opções do Plano ne’ebé tuir kalendáriu aprovadu hosi Konsellu Ministru, Governu sei aprezenta ezbosu Lei refere ba Parlamentu Nasionál (PN) iha loron 10 fulan-Maiu 2022.
Sesaun diseminasaun informasaun ne’e, hetan partisipasaun hosi Primeiru-Ministru, Jenerál Taur Matan Ruak, Vise-Primeiru-Ministru, José Maria dos Reis hamutuk ho Membru Oitavu Governu Konstitusionál.