Ramos-Horta “Dudu-sees” Lú Olo ho Alkatiri iha Sentru Votasaun EBC Farol

Hatutan.com, (19 Marsu 2022), Dili-Iha loron eleisaun prezidensiál 2022, 19 fulan-Marsu ne’e, Kandidatu Prezidente Repúblika (PR), Francisco Guterres “Lú Olo” hamutuk ho Sekretáriu Jeral Partidu FRETILIN, Mari Bin Amude Alkatiri,  ejerse sira-nia direitu síviku hodi vota iha Sentru Votasaun Eskola Bázika Sentrál (EBC) Númeru 01, Farol, Dili.   

Notísia iha Relasaun: Alkatiri-Lú Olo Konfia Manán Metin iha Eleisaun Prezidensiál

Kontajen votu iha Sentru Votasaun EBC 01 Farol, Dili, 19 Marsu 2022. Foto/Hatutan.com

Hafoin ejerse sira-nia votu iha eleisaun prezidensiál ba da-haat (2002-2022), Lú Olo nudár mós Prezidente Partidu FRETILIN ho Mari Alkatiri, Sekretáriu Jerál FRETILIN, deklara ba jornalista sira katak, Kandidatu Prezidente Repúblika (PR) 2022-2027 ho númeru sorteiu 6, Francisco Guterres “Lú Olo” manan matin tiha ona.

Eleisaun prezidensiál ne’e, tuir Lú  Olo ho Alkatiri, atu konfirma de’it vitória Lú Olo nian atu kontinua mandatu Prezidente Repúblika ba daruak nian períodu 2022-2027.

Rezultadu eleisaun iha Sentru votasaun EBC Numeru 01, Farol, Dili, konfirma oin-seluk no kontradís ho deklarasaun Alkatiri no Lú Olo nian.

Kandidatu Prezidente Repúblika (PR) ho númeru sorteiu 14, José Manuel Ramos-Horta, ne’ebé hetan bensaun husi Lider Karizmátiku Kay Rala Xanana Gusmão ho partidu CNRT hetan vitória ho votu 1,144 kompara ho Francisco Guterres “Lú Olo” ne’ebé akumula de’it votu 297.

Rezultadu totál votu entre Kandidatu PR sira 2022-2027 iha Sentru Votasaun EBC 01 Farol, Dili mak hanesan, Isabel Ferreira ho votu (11), Hermes da Rosa Correia Barros (61), Ângela Freitas (1), Rogério Lobato (2), Anacleto Ferreira (5), Francisco Guterres “Lú Olo” (297), Milena Pires (57), Lere Anan Timur (161), Armanda Berta dos Santos (54), Antero Benedito da Silva (1), Constâncio Pinto (3), Virgílio Guterres (17), Martinho Gusmão (5), José Ramos Horta (1144), Felisberto Araújo Duarte (2), Mariano Assanami Sabino (105).

Observadór nasionál no internasionál sira husi G7+ iha Sentru Votasaun EBC 01 Farol, Dili. Foto/Hatutan.com

Totál eleitór ne’ebé tuir vota na’in-1,953, kompostu hosi mane na’in-113 no feto na’in-940. Totál votu ne’ebé tama iha kaixa laran 1,952. Votu válidu ne’ebé atribui ba kada kandidatu hamutuk 1,926. Votu Nulu hamutuk (21), Rejeitadu (0), Reklamadu (1), no Branku (3).

Observasaun Hatutan.com nian iha terrenu nota, molok hakat ba prosesu kontajen votu, brigada sira Sekretariadu Tékniku ba Administrasaun Eleitorál (STAE) nian, taka sentru votasaun iha tuku 15:00 Otl, no kontinua kedan ho prosesu kontajen votu, iha tuku 16:48 Otl no remata iha tuku 22:20, Otl.

Durante prosesu kontajen votu, hetan observasaun direta hosi observadór nasionál, observadór internasionál hosi Uniaun Europeia, fiskais partidu ka kandidatu sira, kobertura hosi média nasionál sira no hetan apoiu seguransa hosi membru PNTL.

Jornalista: Rogério Pereira Cárceres