Remodelasaun, Eldino Rodrigues Troka Mario Ximenes no Maria Correia Troka Maria Fonseca

Hatutan.com, (30 Marsu 2022), Díli- Remodelasaun faze daruak nian, Primeiru-Ministru (PM) Taur Matan Ruak, aprezenta lista naran membru Governu foun na’in-rua ba Prezidente Repúblika, maka hanesan Sekretáriu Estadu ba Terras no Propriedade (SETP), Eldino Rodrigues dos Santos hodi troka Mario Ximenes no Maria do Rosario Fátima Correia troka Maria José da Fonseca nudár Sekretária Estadu ba Igualdade no Inkluzaun (SEII).

Notísia iha Relasaun: Lú Olo Fiar Membru Governu Na’in-haat Sei Benefisia no Hadi’a Dezempeñu Governamentál

Palaçio do Governo. Foto-Gov.tl GPM

Ho nune’e, Prezidente Repúblika, Francisco Guterres “Lú Olo”, liuhusi Dekretu Prezidente Repúblika númeru 20/2022, nomea membru VIII Governu Konstitusionál na’in-rua ne’e no sei simu posse tuir proposta husi Xefe Governu, Kinta (31/03/2022), tuku 09.30 Otl, iha Palásiu Prezidensiál, Dili.

Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru-Ministru.

“Membru Governu na’in-rua ne’ebé hetan nomeasaun husi Prezidente Repúblika mak hanesan, Sekretáriu Estadu ba Terras no Propriedade, Eldino Rodrigues dos Santos no Sekretária Estadu ba Igualdade no Inkluzaun, Maria do Rosario Fátima Correia,” komunikadu ne’ebé Hatutan.com sita.

Liuhusi Dekretu Prezidente Repúblika númeru 19/2022, bazeia ba proposta Primeiru-Ministru nian, Prezidente Repúblika ezonera: Sekretáriu Estadu ba Terras no Propriedade, Mario Ximenes ho Sekretária Estadu ba Igualdade no Inkluzaun, Maria José da Fonseca Monteiro de Jesus.

Iha remodelasaun faze dahuluk nian, Prezidente Repúblika Francisco Guterres “Lú Olo” fó pose iha loron 22 Marsu 2022. Nune’e, Prezidente Repúblika Francisco Guterres “Lú Olo” iha esperansa no fiar katak, membru Governu na’in-haat ne’ebé simu pose, sei lori benefísiu efetivu no hadi’ak dezempeñu Governamentál iha VIII Konstitusionál.

Membru Governu na’in-haat iha remodelasaun faze dahuluk nian maka hanesan Ministru  Justisa, Tiago Sarmento hodi troka Manuel Cárceres,  Ministru Obra Públikas,  Abel Pires da Silva troka Salvador Pires,  Vise-Ministru  Finansas, António Freitas  troka Sara Lobo Brites no Sekretáriu  Estadu ba  Asuntu  Kombatente Libertasaun Nasional,  Júlio da Conceição Loro Mesak troka Gil da Costa Monteiro “Oan Soru”.

Notísia iha Relasaun: PM Taur Demite Oan Soru Tanba Lakon Konfiansa

Jornalista: Vito Salvador