SNI Prende Kilat Lolon Ida ho Granada Ida Inklui Munisoins Balun

Hatutan.com, (30 Marsu 2022), Dili– Servisu Nasionál ba Intelijénsia (SNI), foin lalais ne’e, prende kilat lolon ida, munisoins balun ho granada ida husi sidadaun sivíl balun.

Kilat lolon ida ho granada ida no munisoins balun ne’ebé SNI prende hodi entrega ba PM Taur Matan Ruak. Foto/Hatutan.com

Tuir informasaun katak, kilat ho nia munisaun, inklui granada ida ne’e, ofisiál SNI sira prende husi sidadaun balun ne’ebé lori subar, maibé konsege kaptura no halo kedan apreensaun ba evidénsia sira.

Evidénsia sira ne’e, SNI entrega ona ba Primeiru-Ministru no Ministru Interiór, Taur Matan Ruak no entrega tutan ba Ministru Defeza (MD), Filomeno da Paixão de Jesus, Kuarta (30/03/2022).

Serimónia entrega husi PM Taur ba MD Filomeno da Paixão de Jesus ne’e hala’o iha rezidensiál ofisial Primeiru-Ministru nian iha Farol, Dili.

Ministru Defeza (MD), Filomeno da Paixão de Jesus informa, nia simu arma ka kilat lolon-ida, munisoins balun ho granada ida husi PM Taur Matan Ruak, maibé, nia parte seidauk identifika didi’ak kilat ne’e ho markasaun ka fábrika hosi Portugés ka Indonézia.

“Foin daudaun ne’e iha sala señór Primeiru-Ministru nian iha entrega de bazuka ida, granada ida ho munisoins balun. Bazuka ha’u la hatene mai fabrika husi Portugés ka   Indonézia,” Filomeno da Paixão de Jesus hateten.

“SNI  maka entrega liuhosi Primeiru-Ministru, Taur Matan Ruak mai ami, ida-ne’e para depois ami tau iha rekordasaun militares ho polísia. Tanba ne’e mak, ohin ha’u rasik mak ba ho Vise-Ministru Interiór (VMI), António Armindo, no Sekretáriu Estadu Protesaun Sivíl (SEPS), Joaquim Gusmão dos Reis Martins, mak reprezenta,” Filomeno informa tán.

Jornalista: Rogério Pereira Cárceres