MCAE Prepara Dokumentu Kona-bá Adezaun TL Ba OMK

Hatutan.com, (04 Abríl 2022), Díli-Ministru Koordenadór Asuntu Ekonomia (MCAE, sigla portugés), Joaquim Amaral, Segunda (04/04/2022), iha Salaun enkontru Timor Plaza, Dili, organiza reuniaun interministeriál hodi diskute kona-bá dokumentu ne’ebé atu submete ba iha Organizasaun Mundiál Komérsiu (OMK).

Notísia iha Relasaun: Tribunál bolu António “Kalohan” ho funsionáriu MCIA na’in haat

Ministru Koordenadór Asuntu Ekonómiku, Joaquim Amaral. Foto/Hatutan.com

Ministru Joaquim dos Santos, ba jornalista sira hateten, reuniaun ne’e nudár preparativus hodi hareE dokumentu nesesáriu sira ne’ebé presiza prepara hodi submete ba iha reuniaun grupu traballu antes lori ba iha Konsellu Ministru.

Liu husi reuniaun interministeriál ne’e halo apresiasaun ba dokumentu sira ne’ebé grupu tékniku prepara ona antes submete ba Konsellu Ministru, hodi lori ba iha reuniaun grupu traballu iha loron 29 fulan-Abríl, tinan ne’e, iha Jenebra, Suisa.

 “Ita Timor Leste prienxe ona rekizitu lubuk ida no prosesu ne’e ita kontinua, hodi halo reforma ba iha asuntu nasional, liu-liu kona-bá rejime komérsiu atu ajusta no aliña ho nasaun sira iha rejionál no internasional. Tamba ne’e, sei kontinua halo reforma lejizlativa lubuk ida, atu nune’e, ita bele ajusta ita-nia preparasaun atu bele partisipa iha OMK nia sistema,” nia dehan.

Daudaun ne’e Timor Leste prienxe ona rekizitu atu adere ba iha OMK, tanba ne’e, enkontru ida-ne’e nudár preparativus ba enkontru nivel altu ba datoluk OMK iha Jenebra, Suisa.

Jornalista: Vito Salvador