Hatutan.com (04Abríl 2022), Díli—Ministériu Públiku (MP) liuhusi Prokuradór Rogério Viegas, husu ba Tribunál atu aplika pena prizaun tinan-rua no suspende ba tinan-rua ba eis Prezidente Parlamentu Nasionál, Adérito Hugo da Costa, relasiona ho krime furtu agravadu “dada eletrisidade ilegál” iha tinan 2016.
Arguidu Aderito Hugo da Costa, marka prezensa iha Tribunál Distritál Dili. Foto/Dok.Hatutan.com
Liuhusi kontinuasaun julgamentu iha Tribunál Distritál Díli (TDD), Segunda (04/04/2022), Prokuradór Rogério Viegas argumenta katak, MP husu pena ne’e tanba konsidera faktus provadu bazeia ba deklarasaun sasin ne’ebé komprova katak arguidu komete krime furtu agravadu ka liga ahi ilegál. Maibé iha mós sirkunstánsia seluk hanesan arguidu koopera di’ak ho TDD no arguidu devolve ona osan $2000, tanba ne’e MP husu Tribunál atu aplika pena suspensaun tinan-rua ba arguidu.
Advogadu privadu Pedro Aparício ne’ebé fó asisténsia legal ba arguidu Adérito Hugo da Costa husu ba Tribunál atu absolve nia kliente husi krime furtu agravadu, ho razaun faktu la provadu atu kondena arguidu no MP la aprezenta lolos autór prinsipál ba ligasaun ilegál ne’e, tanba arguidu rasik laiha koñesimentu kona-bá ligasaun ne’e.
Nune’e, depois de halo komparasaun kontajen ba gastu normál ho montante $120, konklui katak hahú períodu Juñu 2016 to’o Agostu 2017, arguidu nia konduta hamosu ona prejuízu ba Estadu ho montante globál $9,760.
Ho hahalok arguidu, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.
Audiénsia julgamentu prezide hosi juis koletivu Alvaro M. Freitas, Argentino Luíza Nunes, José Gonçalves, MP reprezenta hosi Prokuradór Rogério Viegas no arguidu hetan asisténsia legál hosi advogadu privadu Pedro Aparício.