Xanana Deklara Ramos-Horta Povu Nia Kandidatu Atu Defende Soberania Estadu

Hatutan.com,  (10 Abríl 2022), Lautem- Prezidente partidu  Kongresu Nasionál Rekonstrusaun Timoroan (CNRT, sigla portugés), Kay Rala Xanana Gusmão, Domingu (10/04/2022), iha antigu Kampu Futebol 745, Lospalos, Lautem,  deklara katak José Manuel Ramos-Horta, maka povu nia kandidatu no povu mak sei fo lejitimidade liu husi eleisaun prezidensiál, 19 Abríl ne’e, atu ukun no defende hikas soberania Estadu no hatuur Konstituisaun tuir nia fatin.

Notísia iha Relasaun: Entre Horta ho Lú Olo, Desizaun iha Povu

Prezidente Partidu CNRT, Kay Rala Xanana Gusmão, hala’o kampaña apoiu Kandidatu PR, José Manuel Ramos-Horta iha Munisípiu Lautem, 10 Abríl 2022. Foto/Hatutan.com

Komandante em-Xefe FALINTIL ne’e  fó hatene ba timoroan hotu, husi rai-ulun to’o rai-ikun no tasi-feto to’o tasi-mane, katak iha eleisaun primeira volta, 19 Marsu liubá, Kandidatu ba Prezidente Repúblika, José Manuel Ramos-Horta, kandidatu mai husi  CNRT, maibé agora ba oin, José Ramos-Horta, nudár kandidatu Prezidente Repúblika povu hotu nian no  povu mak fó apoiu liu husi movimentu no partidu politiku sira.

“Partidu politiku, movimentu no eis kandidatu sira hotu-hotu mai mai hamutuk hodi dehan ba nia katak ita-boot, ami povu nia kandidatu,” Kay Rala Xanana Gusmão hateten.

Povu hotu ne’ebé halibur hamutuk iha movimentu no organizasaun masa sira, inklui ho partidu polítiku sira, fó apoiu ba José Ramos-Horta tamba hakarak salva Estadu, liu husi unidade nasional ne’ebé povu unifika ho apoiu ba interese nasional ne’ebé importante tebes ba dezenvolvimentu nasional.

Iha fatin hanesan, prezidente Partidu Demokratiku (PD), Mariano Assanami Sabino hateten, kandidatu José Ramos-Horta iha matenek no forsa diplomasia, tanba ne’e uainhira povu fó fiar ba nia sei asegura no hadia hikas imajen Timor-Leste iha mundu.

Nia afirma, apoiantes no militante hotu PD ne’ebé antes ne’e fó votu konfiansa ba nia iha eleisaun Prezidente Repúblika iha primeira volta, atu mantein ho PD hodi fó votu maioria ba kandidatu José Ramos-Horta iha loron eleisaun hodi lori vitória ba povu nian.

Apoiante Kandidatu PR, José Manuel Ramos-Hora iha Munisípiu Lautem. Foto/Hatutan.com

“Lautem-oan sira tenke firme nafatin hodi apoiu lider karizmátiku Xanana Gusmão no José Ramos-Horta hodi restaura nasaun ne’e nia esperansa ba oin atu povu moris ho di’ak,” Mariano Assansmi Sabino hateten.

Partisipa iha komísiu aberta ne’e partidu apoiante sira hanesan PDRT, FRENTE-MUDANSA, PDC, PD, CNRT, PATIFOR, PUDD no veteranu sira Munisípiu Lautem ho Baucau hamutuk ho movimentha apoiantes tomak ne’ebé apoiu kandidatu José Ramos-Horta.

Komísiu aberta ne’e hetan observasaun husi observadór Komisaun Nasionál ba Eleisaun (CNE, sigla portugés), Provedoria Direitu Umanu no Justisa (PDHJ), observadór husi  sosiedade sivíl  no mós observadór sira husi internasionál.

Jornalista: Vito Salvador