Hatutan.com, (19 Abríl 2022), Díli—Primeiru Ministru (PM) no Prezidente Partidu Libertasaun Popular (PLP) Taur Matan Ruak, garante katak kandidatu Prezidente Repúblika (PR) Francisco Guterres Lú Olo sei hetan vitória iha eleisaun Prezidensial Segunda Volta tanba povu maioria afavór ba VIII Governu Konstitusionál.
“Ha’u dehan ami nia kandidatu Francisco Guterres Lú Olo tenkeser manán no la lakon,” Taur Matan Ruak hateten ba jornalista sira hafoin ezerse votu iha sentru votasaun EBF Metiaut, Díli, Tersa (19/04/2022).
Lee Mós:Timor Leste Gelar Pilpres Putaran Kedua Dengan Pemilih 859.613
Prezidente PLP ne’e mós la preparadu atu lakon, maibé manán atu bele konsolida politika governativa no prepara ba eleisaun jerál 2023 hodi garante estabilidade politika no governativa.
Alende ne’e, atu bele tau prioridade hodi dudu dezenvolvimentu ba oin no kombate ki’ak no mukit iha Timor-Leste (TL).
“Ha’u seidauk hatene katak Lú Olo derrota. Ha’u hatene katak nia manán atu garante estabilidade governativa,” nia subliña.
Xefe governu ne’e apela ba populasaun tomak atu hakmatek, prepara an hodi servisu makás liután no koopera ho governu ne’ebé iha programa barak hakarak ajuda hadi’a povu nia moris.
Jornalista: Vito Salvadór